استانالىق 17 وقۋشى وڭتۇستىك كورەيادا كونكۋرسىنان جۇلدەلى قايتتى

استانا. قازاقپارات - دەدجون قالاسىندا وتكەن «جاس عالىم» حالىقارالىق بايقاۋىنا قاتىسقان جوعارى سىنىپتاردىڭ 32 وقۋشىسى ەلورداعا ورالدى. تۋرنير قورىتىندىسى بويىنشا ەكى وقۋشى ءبىرىنشى ورىن، جەتەۋى ەكىنشى، سەگىز وقۋشى ءۇشىنشى ورىن الدى،

دەپ حابارلايدى ەلوردانىڭ رەسمي سايتى.

كونكۋرسقا بەس سەكسيا بويىنشا 16 قالالىق مەكتەپ وقۋشىلارى قاتىستى. ولار ماتەماتيكا، فيزيكا، حيميا، بيولوگيا، گەوگرافيا، تاريح، ءتىل ءبىلىمى، ەكونوميكادان ءوز جوبالارىن ورىس جانە اعىلشىن تىلدەرىندە ۇسىندى.

№17 مەكتەپ- گيمنازياسىنىڭ وقۋشىسى ايدا قاسىموۆا حيميادان «قورشاعان ورتانى قورعاۋ جانە ادام دەنساۋلىعى» ساناتى بويىنشا جانە № 51 مەكتەپ- گيمنازياسىنىڭ وقۋشىسى دانا يسماعۇلوۆا فيزيكادان «جاڭارتىلاتىن ەنەرگەتيكا - بولاشاق ەنەرگياسى» سەكتسياسىندا ءبىرىنشى ورىن الدى.

«فۋندامەنتالدى ماتەماتيكا جانە قازىرگى زامانعى ەكونوميكاداعى ماتەماتيكالىق ادىستەر» ساناتىندا دارىندى بالالارعا ارنالعان قازاق- تۇرىك ليتسەيىنىڭ وكىلى ابىلاي اقىلبەك، №17 مەكتەپ- گيمنازياسىنىڭ وقۋشىسى ادەلايدا اللاحۆەردييەۆا مەن №75 مەكتەپ- گيمنازياسىنىڭ وقۋشىسى ميرا شاۋالي كۇمىس جۇلدە يەلەندى. دارىندى بالالارعا ارنالعان قتل وقۋشىسى اقىل زايدىلبەك قولا جۇلدەگە قول جەتكىزدى.

وقۋشىلار حيميا مەن بيولوگيادان جوبالاردى «قورشاعان ورتانى قورعاۋ جانە ادام دەنساۋلىعى» سەكسياسىندا قورعادى. بۇل سالادا «كۇمىس» № 60 مەكتەپ- ليتسەيىنىڭ وقۋشىسى جانيا بايماعامبەتوۆا جانە دارىندى بالالارعا ارنالعان ق ت ل وقۋشىسى الىبەك داركەمبايەۆقا بۇيىردى. № 73 مەكتەپ- ليتسەيىنىڭ وقۋشىسى سانجار احمەتوۆ پەن دارىندى بالالارعا ارنالعان قتل وقۋشىسى ءىلياس احمۋرزين ءۇشىنشى ورىن الدى.

«21 - عاسىرداعى ءتىل، مادەنيەت جانە قۇقىق: تانۋ ساتىلارى» ساناتىندا تاريحتان № 3 مەكتەپ- گيمنازياسىنىڭ وقۋشىسى ءادىل زەينەلعابي جانە №1 مەكتەپ- ليتسەيىنىڭ وكىلى توتى نۇرتاي «كۇمىس» ولجالادى، «قولا» №59 مەكتەپ- ليتسەيىنىڭ وقۋشىسى ايالا ورازبايەۆانىڭ ەنشىسىندە. دارىندى قىزدارعا ارنالعان ق ت ل وكىلى دانەليا مۇسابەكوۆا ءتىل ءبىلىمى بويىنشا جوباسىن قورعاپ ءۇشىنشى ورىن الدى، №60 مەكتەپ- ليتسەيىنىڭ وقۋشىسى اڭسار راحمەتوۆ اعىلشىن تىلىنەن قولا الدى. №60 مەكتەپ- ليتسەيىنىڭ وقۋشىسى اسان سوۆەتقاليەۆ پەن №38 مەكتەپ- ليتسەيىنىڭ وقۋشىسى سايان كەمەڭگەر دە ءۇشىنشى ورىن الدى. بۇل ەكەۋى دە «جاڭارتىلاتىن ەنەرگەتيكا - بولاشاق ەنەرگياسى» سەكسياسىندا فيزيكادان ءوز جوبالارىن قورعادى.

جارىس جۇلدەگەرلەرىنىڭ ءبىرى جانيا بايماعامبەتوۆا ءوز پىكىرىمەن ءبولىستى:

«مەن ءوز جوبامدى حيميا پانىنەن ۇسىندىم، ءوزىم حيميا- بيولوگيا سىنىبىندا وقيمىن. شىنىن ايتسام، قيىن بولدى. جۇمىسىمدى ورىس تىلىندە جازعاندىقتان ونى اعىلشىن تىلىنە اۋدارىپ، قورعاۋعا تۋرا كەلدى. ءتورت جىلدان بەرى حيميانى تەرەڭدەتۋ توبىندا وقىپ ءجۇرمىن، وليمپيادالارعا، تۋرنيرلەرگە ءجيى قاتىسامىن، مەكتەپتەن كەيىن عىلىممەن اينالىسپاقپىن».

 ايتا كەتەيىك، وقۋشىلار ساپار اياسىندا بيزنەس مەكتەبىنىڭ پروفەسسورلارىنىڭ «كاسىپكەرلىك شىعارماشىلىق» جانە «يننوۆاتسيالىق مەنەدجمەنت» تاقىرىپتارى بويىنشا دارىستەرىن تىڭدادى.