مەملەكەتتىك «ديپلوممەن - اۋىلعا» جوباسى 17 مىڭنان استام جاس ماماننىڭ باسپانالى بولۋىنا كومەكتەستى
بۇل تۋرالى «اۋىل شارۋاشىلىعىن قارجىلاي قولداۋ قورى» ا ق باسپا ءسوز قىزمەتى حابارلادى.
اۋىل تۇرعىندارىنىڭ ءومىر ساپاسىن جاقسارتىپ، ونىڭ دامۋى ءۇشىن ءبىلىمدى جاس مامانداردى تارتۋدى كوزدەيتىن «ديپلوممەن - اۋىلعا» مەملەكەتتىك جوباسى جاستارعا جاڭا مۇمكىندىكتەر بەرۋدە. اۋىل تىنىسىنا وتە ماڭىزدى سالالار - دەنساۋلىق ساقتاۋ، ءبىلىم بەرۋ، سپورت، مادەنيەت، الەۋمەتتىك ساقتاۋ، ۆەتەريناريا سالاسىنداعى بىلىكتى ماماندارعا ارنالعان باعدارلاما اۋىلعا جۇمىس ىستەۋگە كەلگەن جاستارعا باسقا قولداۋ تۇرلەرىمەن قاتار، باسپانالى بولۋعا كومەكتەسەدى.
باعدارلاما پرەزيدەنت باستاماسىمەن 2010 - جىلدان بەرى جۇزەگە اسىپ كەلەدى. تۇرعىن ءۇيدى ساتىپ الۋعا نەمەسە سالۋعا بيۋدجەتتىك نەسيەلەردى بەرۋ بويىنشا سەنىم بىلدىرىلگەن وكىل (اگەنت) - «اۋىل شارۋاشىلىعىن قارجىلاي قولداۋ قورى» ا ق. جالپى، باعدارلاما باستالعالى بەرى قور ارقىلى 17428 جاس مامانعا 35,8 ميلليارد تەڭگەگە قارجىلاي قولداۋ كورسەتىلدى. اعىمداعى جىلدىڭ وزىندە 810,3 ميلليون تەڭگەگە 335 جاس مامان نەسيە الىپ، اۋىلدىڭ كوركەيۋىنە ءوز ۇلەستەرىن قوسۋدا.
كوش باسىندا الماتى وبلىسى تۇر، وندا 2010 - جىلدان باستاپ 2157 جاس مامانعا باسپانالى بولۋعا نەسيە بەرىلگەن، ەكىنشى ورىندا - 2089 جاسقا قارجىلاي قولداۋ كورسەتكەن قىزىلوردا وبلىسى، ال ءۇشىنشى ورىنعا 1805 كورسەتكىشىمەن باتىس قازاقستان وبلىسى تۇراقتادى. كەيىنگى ساتىدا وڭتۇستىك قازاقستان، سولتۇستىك قازاقستان، اقمولا جانە شىعىس قازاقستان وبلىستارى جاستارى بەلسەندىلىك تانىتۋدا.
باعدارلاما شارتى نەسيەنىڭ ۇزاق مەرزىمگە - 15 جىلعا، ءارى وتە تومەن پايىزبەن - %0,01 بەرىلۋى جاستار اراسىندا «اۋىلدىق يپوتەكاعا» دەگەن قىزىعۋشىلىعىن تۋدىرىپ وتىر.
وسىلايشا، 2014 - جىلى ورال قالاسىنداعى «ماقسات» مەديتسينا كوللەدجىن ءتامامداپ، تۋعان اۋىلىنا ديپلومىمەن ورالعان گۇلاينا حالەلوۆا دا - «اۋىلدىق يپوتەكا» ارقىلى باسپانالى بولعان جاس ماماننىڭ ءبىرى. قازىردە باتىس قازاقستان وبلىسى شىڭعىرلاۋ اۋداندىق ورتالىق اۋرۋحاناسىندا قىزمەت ەتەتىن ول، وقۋىن بىتىرە سالا بۇل باعدارلامامەن تۋعان اۋىلىنا ورالۋدى ءجون كورەدى. ءوز ويىنداعى ءۇيدى تاڭداپ، جىلدىق 0,01 پايىزبەن 2,7 ميلليون تەڭگەنى 15 جىل مەرزىمگە العان گۇلاينا حالەلوۆا، ونىڭ ومىرلىك جولىندا بۇل باعدارلامانىڭ ۇلكەن قولداۋ بولعانىن ايتتى.
«جاڭادان جۇمىسقا تۇرعان مامانعا ەشكىم دە بىردەن نەسيە بەرمەيدى، ءارى مۇنداي از پايىزبەن ارزانعا ءۇيدى الا المايسىڭ»، - دەي كەلە، قازىردە ايىنا 15 مىڭ تەڭگە تولەيتىنىن، ءارى بۇل سوما وعان ەش قارجىلىق قيىندىق تۋعىزبايتىنىن قۋانا جەتكىزدى. «قازىر وتباسىمنىڭ قاسىندا، تۋعان اۋىلىمنىڭ دامۋىنا ۇلەسىمدى قوسىپ جاتقانىما قۋانامىن ءارى قالعان ءۇش باۋىرىم دا جاڭا ۇيىمىزگە ريزا. باعدارلاما ارقاسىندا قازىر وزىمە ۇنايتىن جۇمىسىم دا بار، باسپانام دا بار»، - دەيدى جاس مامان.
وقۋ جىلى اياقتالىپ، اۋىلدى كوركەيتۋدە ەڭبەك ەتۋ تاڭداۋىن جاساعان جاستارعا قوردىڭ ەلىمىزدىڭ بارلىق وبلىس ورتالىقتارىندا، سونداي- اق، استانا، الماتى، سەمەي قالالارىندا ورنالاسقان فيليالدارى جۇمىس جاسايدى. تولىق كەڭەستى جەرگىلىكتى اۋداندىق اكىمدىكتەر قىزمەتكەرلەرى دە بەرە الادى.
«اۋىل شارۋاشىلىعىن قارجىلاي قولداۋ قورى» اكسيونەرلىك قوعامى - «قازاگرو» ۇلتتىق باسقارۋشى حولدينگى» ا ق قۇرامىنا كىرەتىن مامانداندىرىلعان قارجى- نەسيەلىك ۇيىمى. 2007 - جىلدان باستاپ «قازاگرو» ۇلتتىق باسقارۋشى حولدينگى» ا ق قۇرامىنا كىرەدى. قوردىڭ ميسسياسى - اۋىلدىق كاسىپكەرلىكتى دامىتۋ، اۋىلدى جەرلەردە ءتيىمدى شاعىن نەسيەلەۋ جۇيەسىن دامىتۋ ارقىلى حالىقتىڭ حال- اۋقاتىن ارتتىرۋ.