قازاقستاندىق سپورتشىلاردى ازيادا مەن جاسوسپىرىمدەر وليمپياداسىنا 17 شەتەلدىك جاتتىقتىرۋشى دايىنداۋدا

بۇل تۋرالى بۇگىن ق ر سپورت ىستەرى جانە دەنە شىنىقتىرۋ اگەنتتىگى ءتوراعاسىنىڭ ورىنباسارى ەلسيار قاناعاتوۆ ءمالىم ەتتى.
«6 قۇراما كومانداعا، اتاپ ايتقاندا دزيۋدو، گرەك- ريم كۇرەسى، بايداركا مەن كانوە ەسۋ، سۋ پولوسى جانە اۋىر اتلەتيكا سپورت تۇرلەرى بويىنشا كەلىسىمشارت نەگىزىندە 17 شەتەلدىك جاتتىقتىرۋشى شاقىرىلدى» ، - دەدى ە. قاناعاتوۆ.
ونىڭ اتاپ وتۋىنشە، ەكى بايراقتى باسەكەگە دە دايىندىق شارالارىن قارجىلاندىرۋدا ەشقانداي پروبلەما جوق.
ازيادادا شاكىرتى جۇلدەگە ىلىكپەگەن باپكەر قىزمەتىنەن كەتەدى.
«بىردەن ەسكەرتەيىن، ازيادا ويىندارىندا جۇكتەلگەن مىندەت ۇدەسىنەن شىقپاعان باس جاتتىقتىرۋشىلارعا قىزمەتىنەن بوساتۋعا دەيىنگى قاتاڭ شارا قولدانىلادى. ويتكەنى، بىزدەرگە كەلەسى كەزەڭگە، ريو دە جانەيرودا وتەتىن جازعى وليمپيادا ويىندارىنا تىڭعىلىقتى دايىندالۋىمىز كەرەك» ، - دەدى اگەنتتىك ءتوراعاسىنىڭ ورىنباسارى.
ەستەرىڭىزگە سالا كەتەيىك، قىركۇيەكتىڭ 19 ىنان قازاننىڭ 4 ىنە دەيىن وتەتىن ازيادا ويىندارىنا سپورتتىڭ 39 تۇرىنەن 400-410 سپورتشى قاتىسادى. ال تامىزدىڭ 16-28- كۇندەرى ارالىعىندا وتەتىن جاسوسپىرىمدەر وليمپياداسىندا قازاقستان نامىسىن سپورتتىڭ 21 تۇرىنەن 50 سپورتشى قورعايتىن بولادى.