مەملەكەتتەر وسالدىعى رەيتينگىندە قازاقستان 179 ەلدىڭ اراسىندا 116-بولدى
نۇر-سۇلتان. قازاقپارات - مەملەكەتتەر وسالدىعى بويىنشا رەيتينگىدە قازاقستان 179 ەلدىڭ ىشىندە 116-ورىنعا جايعاستى، دەپ حابارلايدى قازاقپارات Finprom.kz سايتىنا سىلتەمە جاساپ.
مەملەكەتتەر وسالدىعى بويىنشا قازاقستان 2021-جىلى 179 ەلدىڭ ىشىندە 116-بولدى. قازاقستان وسالدىعىنىڭ كورسەتكىشى - 61,2. بۇل - قاۋىپتىلىكتىڭ بىركەلكى دەڭگەيى. مەملەكەتتەردىڭ وسالدىعى يندەكسى ەلدىڭ بەلسەندى كونفليكتكە دەيىنگى، كونفليكت بارىسىنداعى جانە ودان كەيىنگى پوزيتسياسىنىڭ السىزدىگىن باعالايدى.
يندەكس ۇيىمشىلدىق، ەكونوميكالىق جانە ساياسي جاعداي، الەۋمەتتىك سالا سياقتى ءتورت باعىتتى، سونداي-اق ەلدىڭ وسالدىعىن ولشەۋ ءۇشىن قولدانىلاتىن كونفليكت قاتەرىنىڭ 12 ينديكاتورىن قامتيدى (قاۋىپسىزدىك اپپاراتى، ەليتالاردىڭ فراكسيالارعا ءبولىنۋى، توپتىق نارازىلىق، ەكونوميكالىق قۇلدىراۋ، بىركەلكى ەمەس ەكونوميكالىق دامۋ، ادامداردىڭ باس ساۋعالاپ كەتۋى جانە ەلدەن كوشۋى، مەملەكەتتىڭ لەگيتيمدىگى، قوعامدىق قىزمەتتەر، ادام قۇقىقتارى جانە زاڭ ۇستەمدىگى، دەموگرافيالىق قىسىم، بوسقىندار، سىرتقى ارالاسۋ).
كورسەتكىش قانشالىقتى جوعارى بولسا، ەل سونشىلىقتى ءالسىز دەگەندى بىلدىرەدى. قازاقستاننىڭ ەلدىڭ لەگيتيمدىلىگى (8,2 ۇپاي)، توپتىق كوڭىل تولماۋشىلىق (8 ۇپاي) جانە ەليتالاردىڭ فراكسيالارعا ءبولىنۋى (7,6 ۇپاي) بويىنشا كورسەتكىشتەرى جوعارى.
ەڭ وسال ەلدەر رەيتينگىن يەمەن، سومالي جانە سيريا باستاپ تۇر.
ت م د- نىڭ وزگە ەلدەرىنىڭ كورسەتكىشتەرى قازاقستاننان ناشار بولىپ شىقتى. قىرعىزستان - 68، ازەربايجان جانە تاجىكستان - 71، رەسەي - 74، وزبەكستان - 80، ارمەنيا جانە ۋكراينا - 91، تۇرىكمەنستان - 97، بەلارۋس - 98 جانە مولدوۆا 103-ورىندا ورنالاسقان.
الەمنىڭ ەڭ تۇراقتى ەلدەرى رەتىندە فينليانديا، نورۆەگيا جانە يسلانديا اتالدى.
