قاشىقتان وقۋ: مەملەكەتتىك اۋديت س ق و-دا 177 نوۋتبۋكتى تاپپاي قالدى
بۇل تۋرالى ق ر قارجى مينيسترلىگىنەن ءمالىم ەتتى، دەپ حابارلايدى قازاقپارات. ءمالىم ەتىلگەندەي، مينيسترلىكتىڭ سولتۇستىك قازاقستان وبلىسى بويىنشا ىشكى مەملەكەتتىك اۋديت دەپارتامەنتى 6 وبەكتىدە جۇرگىزىلگەن اۋديتتى اياقتادى.
«ايىرتاۋ اۋدانى اكىمدىگىنىڭ ءبىلىم بولىمىندە اۋداندىق مەكتەپ وقۋشىلارىن قاشىقتان وقىتۋعا رەسپۋبليكالىق بيۋدجەت ەسەبىنەن جالپى سوماسى 28 ميلليون تەڭگەگە ساتىپ الىنعان 177 نوۋتبۋكتىڭ جەتىسپەيتىنى انىقتالدى. تاپشىلىقتىڭ سەبەبى - نەگىزگى قۇرالداردىڭ ساقتالۋى مەن دۇرىس پايدالانىلۋىن ناشار باقىلاۋ. اۋديت ماتەريالدارى قۇقىق قورعاۋ ورگاندارىنا بەرىلدى»، - دەدى ۆەدومستۆودان.
جالپى، 6 نىساندا جۇرگىزىلگەن اۋديتورلىق ءىس-شارالار بارىسىندا 80268,7 ميلليون تەڭگە سوماسىن قۇرايتىن بۇزۋشىلىقتار انىقتالدى. ونىڭ ىشىندە قارجىلىق بۇزۋشىلىقتار - 39119,6 ميلليون تەڭگە، پروتسەسسۋالدىق بۇزۋشىلىقتار - 41149,1 ميلليون تەڭگە.
«4 وبەكتىدە بۋحگالتەرلىك ەسەپ پەن قارجىلىق ەسەپتىلىك جالپى زاڭناما تالاپتارىنا سايكەس كەلەدى. ال 2 وبەكتىدە ەلەۋلى بۇزۋشىلىقتارمەن جۇرگىزىلىپ كەلگەن. قارجىلىق ەسەپتىلىكتىڭ ءاۋديتى قارجىلىق ەسەپتىلىكتىڭ سەنىمدىلىگىن، دۇرىستىعىن، بۋحگالتەرلىك ەسەپ پەن قارجىلىق جاعدايىن باعالاۋ ماقساتىندا جۇرگىزىلدى»، - دەدى مينيسترلىكتەن.
