13:49, 06 - اقپان 2020 | GMT +6
ابايدىڭ 175 جىلدىعىنا وراي تۇسىرىلەتىن تەلەحيكايا اكتەرلەرىنە كاستينگ جاريالاندى
نۇر- سۇلتان. قازاقپارات - «قازاقستان» تەلەراديوكورپوراتسياسى ۇلى اقىن ابايدىڭ 175 جىلدىعىنا وراي تۇسىرەتىن تەلەحيكايا اكتەرلەرىنە بايقاۋ جاريالايدى، دەپ حابارلايدى قازاقپارات تەلەارنانىڭ Telegram پاراقشاسىنا سىلتەمە جاساپ.
كاستينگكە ارنايى اكتەرلىك ءبىلىمى بار، 17 مەن 40 جاس ارالىعىنداعى قولاڭ شاشتى، قويۋ قاستى قىز- كەلىنشەكتەر مەن 15 پەن 50 جاس ارالىعىنداعى كەسكىن- كەلبەتى كەلىسكەن، اتقا وتىرا الاتىن ەر- ازاماتتار قاتىسا الادى.
«بۇعان دەيىن تەلەحيكايانىڭ سەناريىنە بايقاۋ جاريالانىپ، وتاندىق تاجىريبەلى وندىرۋشىلەردەن ءۇش اي بويى ءوتىنىم قابىلدانعان بولاتىن. بۇگىننەن باستاپ تەلەراديوكورپوراتسيانىڭ شىعارماشىلىق بىرلەستىگى مەن ارنايى قۇرىلعان كوركەمدىك كەڭەستىڭ قابىلداعان نۇسقاسى بويىنشا ءتۇسىرىلىم جۇمىستارىنا ازىرلىك باستالدى» دەلىنگەن حابارلامادا.
ۇمىتكەرلەر ءوزى تۋرالى اقپاراتتى (فوتو، ۆيدەو) 15 -اقپانعا دەيىن casting.abai@kaztrk.kz پوشتاسىنا جولداي الادى. قوسىمشا اقپارات: 87477066494, 87074015591.
