ءابۋ-دابيدە ابايدىڭ 175 جىلدىعىنا وراي قازاقستان كينوسىنىڭ كۇندەرى ءوتتى
بۇل جايىندا قازاقستاننىڭ بىرىككەن اراب امىرلىكتەرىندەگى ەلشىلىگى ءمالىم ەتتى، دەپ حابارلايدى قازاقپارات ءتىلشىسى.
ابايدىڭ 175 جىلدىعىنا وراي ءابۋ-ءدابيدىڭ «مانارات اس-سااديات» مادەني ورتالىعى كينوتەاترىندا ش. ايمانوۆ اتىنداعى «قازاق فيلمنىڭ» تۋىندىسى «اباي. ءومىربايانى مەن شىعارماشىلىعى» اتتى دەرەكتى فيلمى جانە «قۇنانباي» كوركەم فيلمىنىڭ كورسەتىلىمى اياقتالدى. ءۇش كۇنگە جالعاسقان قازاق كينوسىنىڭ كۇندەرى اياسىندا اراب جۇرتشىلىعى ابايدىڭ شىعارماشىلىق مۇراسىمەن تانىسىپ، قازاقتىڭ ۇلى ويشىلىنىڭ دانالىعىنا ءتانتى بولدى.
ماڭىزدى مادەني شاراعا ءابۋ-دابي قالاسىنىڭ مادەنيەت جانە تۋريزم دەپارتامەنتى، امىرلىكتەردىڭ سىرتقى ىستەر جانە حالىقارالىق ىنتىماقتاستىق مينيسترلىگى، ديپلوماتيالىق كورپۋس وكىلدەرى مەن قوعام قايراتكەرلەرى، سونداي-اق قالا تۇرعىندارى، ولاردىڭ اراسىندا وسى ەلدە جۇمىسىن جاساپ، جوعارى ءبىلىمىن الىپ جاتقان قازاقستاندىقتار شاقىرىلدى.
قازاقستان رەسپۋبليكاسىنىڭ بىرىككەن اراب امىرلىكتەرىندەگى ەلشىسى ماديار مەڭىلبەكوۆ قازاق ادەبيەتىنە، ابايدىڭ ءومىربايانىنا قىزىعۋشىلىق تانىتىپ، قازاقستاندىق كينونى تاماشالاۋعا كەلگەن قاۋىمعا العىسىن ءبىلدىردى. ونىڭ ايتۋىنشا، بۇل ءىس-شارا كوپشىلىككە قازاق حالقىنىڭ تاريحى مەن مادەنيەتىن ءبىلىپ-تانۋعا، ەكى حالىق اراسىن ءارى قاراي جاقىنداستىرۋعا زور ىقپال ەتىپ، اباي دارىپتەگەن جوعارى قۇندىلىقتار مەن مۇراسىن شەتەلدىك جۇرتشىلىققا كينونىڭ تىلىمەن جەتكىزدى.
سونداي-اق، قازاق كينوسىنىڭ كۇندەرى اياسىندا «قازاق ءبيى» (رەج. ا. سادىقوۆا، ع. ناسىروۆ)، «قازاق حاندىعى. التىن تاق» جانە «الماس قىلىش» (رەج. ر. ابدىراشيەۆ)، «ەلباسى جولى. استانا» (رەج. ا. ساتايەۆ)، «امىرە» (رەج. دج. ۆەسپا) فيلمدەرى امىرلىكتەر كورەرمەنىنە جول تارتتى.
