ابايدىڭ 175 جىلدىق مەرەيتويىنا ارنالعان برەندبۋك ازىرلەندى

نۇر-سۇلتان. قازاقپارات - ۇلى اقىننىڭ مەرەيتويىنا وراي ارنايى برەندبۋك دايىندالدى، دەپ حابارلايدى قازاقپارات «رۋحاني جاڭعىرۋ» قازاقستاندىق قوعامدىق دامۋ ينستيتۋتىنا سىلتەمە جاساپ.

«لوگوتيپتە تانىمال بەينەنى كورسەتۋ ماقساتىندا قازاق ويشىلى مەن اقىنىنىڭ پورترەتى ەگجەي-تەگجەيلى پىسىقتالدى. پورترەتتىڭ نەگىزگى ءتۇسى - كۇلگىن. ول كەيىپكەردىڭ كوڭىل-كۇيىن، ويشىلدىعىن ءھام پايىمدىلىعىن كورسەتەدى. لوگوتيپتى قابىلداۋ وڭاي جانە پايدالانۋعا ىڭعايلى بولۋى ءۇشىن ونىڭ نىسانى گرافارەتتىك ستيلدە قاراپايىم گرافيكا ەلەمەنتتەرىمەن ازىرلەنگەن. گاممادا بۇدان بولەك كوك، قىزىل، جۇپارگۇل جانە قۇم (التىن) تۇستەرى دە بار»، - دەلىنگەن حابارلامادا.

ينستيتۋتتىڭ مالىمەتىنشە، لوگوتيپ سيپاتتاماسىندا ابايدىڭ ەڭسەسى كوتەرىڭكى جانە ونىڭ ەرىك-جىگەرى مەن دانالىعىن انىق كورۋگە بولادى.

«الدىمىزدا ۇلى ويشىلدىڭ بەينەسى تۇرعانىن ونىڭ جازىق ماڭدايى، قالىڭ قاباعى پاش ەتەتىندەي. ابايدىڭ وزىنە ءتان بەينەسىن توپى مەن كامزول تۇرىندەگى كيىم ەلەمەنتتەرى تولىقتىرا تۇسكەن. فيرمالىق ستيلدە اباي پورترەتى عانا ەمەس، ءىس-شارانىڭ ماڭىزدى قۇرامداس بولىگى رەتىندە 175 سانى دا قولدانىلعان. نەگىزگى ەلەمەنتتەرگە قوسىمشا قۇراق كورپە ستيلىندەگى گرافيكا جانە تانىمال ۇلتتىق ورنەك قوسىلعان. بۇل ستيل ۇلتتىق بەينەنى ايقىنداي تۇسەدى. ءار ءتۇرلى ديزاينعا وڭاي بەيىمدەلەدى»، - دەپ جازىلعان اقپاراتتا.

حابارلامادا ايتىلعانداي، مەرەكەلىك ءىس-شارالاردى تياناقتى رەسىمدەۋ ءۇشىن برەندبۋك قۇرامىندا: لوگوتيپ تۇجىرىمداماسى، فيرمالىق ستيل بويىنشا نۇسقاۋلىق، تاراتۋ ماتەريالدارىنىڭ ديزاينى، كولىكتى بەزەندىرۋ ديزاينى، ىسكەرلىك قۇجاتتاردى راسىمدەۋ ديزاينى مەن سىرتقى جارنامانى راسىمدەۋ ماتەريالدارى قامتىلعان.

ايتا كەتەيىك، برەندبۋك ق ر اقپارات جانە قوعامدىق دامۋ مينيسترلىگىنىڭ تاپسىرىسى بويىنشا ازىرلەندى.