#اباي175: جاپونياداعى ەلشى ابايدىڭ قارا ءسوزىن قازاق جانە جاپون تىلىندە وقىدى

نۇر-سۇلتان. قازاقپارات - قازاقستاننىڭ جاپونياداعى ەلشىسى ەرلان باۋداربەك-قوجاتايەۆ اباي شىعارماشىلىعىنا ارنالعان ەستافەتاعا ءۇن قوستى، دەپ حابارلايدى قازاقپارات ەلشىلىككە سىلتەمە جاساپ.

«قۇرمەتتى دوستار «ۇلى دالا ەلىمەن كۇنشىعىس ەل اراسىنداعى دوستاستىق ماڭگىلىك بولسىن» دەگەن تاكەو كاۆامۋرا مىرزانىڭ دوستىق تۋرالى پىكىرىنە قوسىلا وتىرىپ ابايدىڭ اسىل مۇراسىنىڭ 37- قارا سوزىنەن ءۇزىندى وقىپ بەرۋگە رۇقسات ەتىڭىزدەر»، دەدى ەستافەتانى قابىل العان ەرلان باۋداربەك-قوجاتايەۆ. ەلشى مىرزا دانىشپاننىڭ دوستىق جونىندەگى ۇلاعاتتى سوزىنەن ءۇزىندىنى قازاقشا وقىعان سوڭ، ونى جاپون تىلىنە اۋدارىپ شىقتى.

ەرلان باۋداربەك-قوجاتايەۆ ەستافەتانى «سازگەن» ءانسامبلىنىڭ جەتەكشىسى باعدات تىلەگەنوۆكە جولدادى.

ايتا كەتەرلىگى، بۇعان دەيىن پوەتيكالىق ەستافەتانى قازاقستاندىق ارىپتەسىنەن قابىلداپ، ابايدىڭ تەرەڭ ماعىنالى قارا سوزدەرىنەن ءۇزىندى وقىعان جاپوندىق دەپۋتات تاكەو كاۆامۋرا ونى جالعاستىرۋدى قازاقستاننىڭ وسى ەلدەگى ەلشىسى ەرلان باۋداربەك-قوجاتايەۆقا ۇسىنعان بولاتىن.

ەسكە سالا كەتسەك، ق ر پرەزيدەنتى قاسىم-جومارت توقايەۆ ابايدىڭ 175 جىلدىعىنا ارنالعان 9 جاسار مەكتەپ وقۋشىسىنىڭ ەستافەتاسىن قابىل الىپ، ونى ءبىلىم جانە عىلىم ءمينيسترى اسحات ايماعامبەتوۆكە جانە بۇكىل الەمدى مويىنداتقان تالانتتى ءانشى ديماش قۇدايبەرگەنگە جولداعان ەدى.

اتالمىش ەستافەتانى «قازاقپارات» حالىقارالىق اقپارات اگەنتتىگىنىڭ ۇجىمى «Egemen Qazaqstan» گازەتىنەن قابىل الىپ، ابايدىڭ «كوزىمنىڭ قاراسى» ءانىن بەس تىلدە شىرقادى.