ماڭعىستاۋدا قىمىز ساتاتىن كاسىپكەر جىلقىلارىنىڭ سانىن 175 كە جەتكىزدى
5 جىل بۇرىن ول ءوز ءىسىن باستاعان كەزدە تابىندا نەبارى 20 جىلقى بولدى. ەندى ونىڭ سانى 175 كە جەتتى، ولاردىڭ ىشىندە فرانسۋز، اراب، قىرعىز، باشقۇرت، رەسەي، اعىلشىن تۇقىمى بار. مىسالى، فرانسيادان قۇلىندى ول 60 مىڭ دوللارعا ساتىپ العان. شارۋاشىلىقتا 12 ادام جۇمىس ىستەيدى. تابىس كوزى - قىمىز ساتۋ.
«قازىرگى ساتتە اباي جادىگەروۆ - قىمىز ساتاتىن اۋدانداعى جالعىز كاسىپكەر. اگروونەركاسىپتىك كەشەندە جاڭا بيىكتەرگە قول جەتكىزۋ ءۇشىن كاسىپكەرگە مۇنايلى اۋدانى كاسىپكەرلەر پالاتاسى جاردەم كورسەتۋگە ءازىر. ەگەر كەلەشەكتە كاسىپكەر جاقىن قالالار مەن اۋداندارداعى دۇكەندەرگە دايىن ءونىمىن جەتكىزۋ ماسەلەسىن شەشسە، وعان كاسىپكەرلەردى قولداۋ ورتالىعى دا كومەكتەسەدى. مەملەكەتتىك قولداۋ شارالارى تۋرالى كەڭەس بەرۋ، ساۋاتتى بيزنەس-جوسپار جاساۋ، بيزنەستىڭ قىسقامەرزىمدى نەگىزدەرىنە وقىتۋ ەش قيىندىق تۋدىرمايدى»، - دەپ اتاپ ءوتتى اۋداننىڭ ك پ فيليالىنىڭ ديرەكتورى ادىلەت سامي.
شارۋا قوجالىعىندا قىسقى ۋاقىتتا 7 بيەدەن كۇنىنە 10 ليتر ءسۇت الىنادى. جازعى ۋاقىتتا ورتاشا 100 ليتر الۋعا بولادى. قىمىزدى نەگىزىنەن اۋدان، وبلىس ورتالىعىنىڭ تۇرعىندارى ساتىپ الادى. ولار تاڭ سارىدەن وزدەرى-اق شارۋاشىلىققا كەلەدى، سوندىقتان قىمىز ساتۋ جاعىنان پروبلەما جوق.
«ءار كۇنى تاڭەرتەڭ شارۋاشىلىققا 50-60 ادام كەلىپ، قىمىز ساتىپ الادى. قىمىز وكپە، بۇيرەك، اسقازان اۋرۋلارىنا ەم، ءارى تابەتتى ارتتىرادى. قىمىزبەن نەسەپ-تاس اۋرۋىن، وكپە، تۋبەركۋلەز، اسقازان جاراسى، اتەرسكلەروزدى ەمدەپ، ورتالىق جۇيكە جۇيەسى، قان اينالىم جۇيەسىن جاقسارتۋعا بولادى. تىلەك بىلدىرۋشىلەر دە كوپ، تاڭعى 5 تەن كەلىپ كەزەككە تۇرادى. بارلىعىن ۇلتتىق سۋسىنمەن قامتاماسىز ەتۋ ازىرگە مۇمكىن ەمەس. كەلەشەكتە ءۇيىردى 500 گە جەتكىزەمىز. بۇل قىمىز ءوندىرىسىن ارتتىرۋعا، ادامداردى جۇمىسپەن قامتۋعا مۇمكىندىك بەرەدى. تاياۋ ۋاقىتتا كاسىپكەرلىكتى قولداۋ ورتالىعىنا بارماقپىن. قولدانىستاعى مەملەكەتتىك باعدارلامالار جايلى بىلگىم كەلەدى، ەگەر شارتى ءتيىمدى بولسا، بانكتەن كرەديت الۋعا قارسى ەمەسپىن»، - دەگەن ويىمەن ءبولىستى ا. جادىگەروۆ.
