باتىس قازاقستانعا ەلىمىز تاۋەلسىزدىك العاننان بەرى 17561 ادام كوشىپ كەلدى
بۇل تۋرالى «قازاقستان اگراريلەرى» قوعامدىق بىرلەستىگىنىڭ باستاماسىمەن جانە ب ق و ىشكى ساياسات باسقارماسىنىڭ قولداۋىمەن وتكىزىلگەن «ورالمانداردى قوعامدىق ومىردە الەۋمەتتىك قولداۋ جانە بەيىمدەۋ قىزمەتىنىڭ جۇمىسىن ۇيىمداستىرۋ» اتتى دوڭگەلەك ۇستەل وتىرىسىندا ايتىلدى.
ب ق و جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى كوشى-قون ءبولىمىنىڭ باسشىسى ەربولات ساعىنوۆتىڭ ايتۋىنشا، اتاجۇرتقا قانداستار نەگىزىنەن وزبەكستان، رەسەي، تۇركىمەنستان، قىرعىزستان، تاجىكستان، ازەربايجان، قىتاي، موڭعوليادان قونىس اۋدارۋدا. بيىلدىڭ وزىندە 21 وتباسى (37 ادام) كوشىپ كەلسە، سونىڭ 10 ى - رەسەيدەن كەلگەندەر.
وتىرىس بارىسىندا ەلباسى بيىلعى 26- قاراشادا قول قويعان «كوشى-قون تۋرالى» زاڭعا وزگەرىستەر مەن تولىقتىرۋلار ەنگىزۋ تۋرالى» زاڭ بويىنشا ەنگىزىلگەن وزگەرىستەر جونىندە كەڭىنەن تۇسىنىك بەرىلىپ، سونداي-اق ماماندار قاتىسۋشىلاردىڭ ورالمان مارتەبەسىن الۋ، بيزنەس اشۋ ءۇشىن جەر تەلىمىنە قول جەتكىزۋ جانە باسقا وسى تەكتەس ساۋالدارىنا جاۋاپ بەردى. الداعى جىلى ورال قالاسىندا «وتانداستار» قىزمەت كورسەتۋ ورتالىعى اشىلاتىنى جاريا ەتىلدى. وندا ورالمانداردىڭ مۇنداعى ومىرگە تەز بەيىمدەلۋى ءۇشىن ولارعا كەڭەستە بەرىلمەك.
تاياۋدا بيىلعى جىلدى قورىتىندىلاپ، جۋرناليستەرگە بەرگەن سۇحباتىندا ەلباسى نۇرسۇلتان نازاربايەۆ جاڭا زاڭعا سايكەس ورالماندارعا قۇجات تاپسىرۋ، ازاماتتىق بەرۋ ماسەلەسى جەڭىلدەتىلگەنىن اتاپ وتكەنى بەلگىلى. تاۋەلسىزدىك العاننان بەرى ەلىمىزگە 1 ميلليون قانداسىمىز كەلسە، اتاجۇرتقا ورالامىن دەۋشىلەرگە الداعى ۋاقىتتا دا قولداۋ كورسەتىلەتىن بولادى.
ب ق و ىشكى ساياسات باسقارماسى ساياسي پارتيالارمەن جانە ۇكىمەتتىك ەمەس ۇيىمدارمەن جۇمىس ءبولىمىنىڭ باسشىسى جامال يحسانوۆانىڭ سوزىنە قاراعاندا، 2016-جىلى وڭىردە وتانداستار فورۋمىن وتكىزۋ كوزدەلۋدە. مەملەكەت باسشىسىنىڭ تاپسىرماسىنا سايكەس ەلگە ورالۋشىلارعا ءتيىستى جاردەم بەرىلەدى. مىسالى، ولاردىڭ بازاسىن جاساپ، كىتاپشا شىعارۋ، جەرگىلىكتى ەلمەن، سونداي-اق ءبىر-بىرىمەن ەتەنە ارالاسۋى ءۇشىن ءتۇرلى شارالار وتكىزۋ جوسپارلانۋدا.
