ابايدىڭ 175 جىلدىعىنا وراي 100 ولەڭى يسپان تىلىنە اۋدارىلادى
قازاقستان جازۋشىلار وداعىنىڭ نۇر-سۇلتان قالالىق فيليالىنىڭ ديرەكتورى داۋلەتكەرەي كاپ ۇلىنىڭ ايتۋىنشا، مادريدتىك اقىن ابايدىڭ 100 ولەڭىن يسپان تىلىنە اۋدارۋعا كەلىسىم بەرگەن.
«بۇل فورۋمعا ەۋرازيا كەڭىستىگىندەگى استانالاردا تۇراتىن، الەمگە ەسىمى بەلگىلى ادەبيەت تۇلعالاردى شاقىردىق. سونىڭ ىشىندە بۇكىل لاتىن امەريكاسىنا تانىمال، يسپان ءتىلدى مەملەكەتتەردىڭ بارلىعى بىلەتىن، شىعارمالارى الەمنىڭ 35 تىلىنە اۋدارىلعان مادريدتىك اقىن حۋنتە حورحە پادروندى ەرەكشە اتاۋعا بولادى. ول وسىدان ەكى جىل بۇرىن قازاقتىڭ ءۇش عاسىرلىق ادەبيەتىن يسپان تىلىنە اۋدارىپ، كىتاپ ەتىپ شىعارعان بولاتىن. كەلەسى جىلى ۇلى ابايدىڭ 175 جىلدىعىن تويلاعالى وتىرمىز. فورۋم اياسىندا وسى مادريدتىك اقىنمەن ابايدىڭ 100 ولەڭىن اۋدارۋ تۋرالى كەلىسىمشارتقا قول قويامىز»، - دەدى جازۋشىلار وداعىنىڭ وكىلى.
فورۋم اياسىندا قازاق اقىندارىن باۋىرلاس ەلدەردىڭ تىلىنە اۋدارۋ بويىنشا دا بىرنەشە كەلىسىمدەر جاسالماق.
«بۇدان بولەك، انكارالىق ادەبيەتشى عالىمدى شاقىردىق ول كىسى قازىرگى قازاق ادەبيەتىنەن 7 كىتاپ اۋدارعان. مەن ءبىر-ەكى مىسالىن عانا ايتىپ تۇرمىن. ايتپەسە بۇگىنگى فورۋم قوناقتارىنىڭ بارلىعىمەن تىعىز بايلانىس ورناتۋدى جوسپارلاپ وتىرمىز. فورۋمعا بىرىككەن اراب امىرلىكتەرى جازۋشىلار وداعىنىڭ، اۋعانستان يسلام رەسپۋبليكاسىنىڭ جازۋشىلار وداعىنىڭ باسشىلارى قاتىسىپ وتىر»، - دەيدى داۋلەتكەرەي كاپ ۇلى.
ەسكە سالساق، بۇگىن نۇر-سۇلتان قالاسىندا ەۋرازيا استانالارى قالامگەرلەرىنىڭ فورۋمى ءوتىپ جاتىر.