الماتىدا 174 ادام نۇرسۇلتان شىڭىنا شىقتى
ق ر تاۋەلسىزدىگىنىڭ 25 جىلدىعىنا جانە الماتىنىڭ 1000 جىلدىق مەرەيتويىنا ارنالعان بۇل سپورتتىق شاراعا قاتىسۋعا 1200 دەن استام ادام تىركەلگەن بولاتىن. دەگەنمەن، نۇرسۇلتان شىڭىنا اۋا رايىنىڭ قولايسىزدىعىنا بايلانىستى بارلىعى 174 ادام كوتەرىلدى. ال «سكايراننينگ»، ياعني تاۋ باسىنا شاپشاڭ جۇگىرىپ شىعۋ جارىسىنا - 82 ادام قاتىستى، - دەپ حابارلايدى الماتى قالاسىنىڭ دەنە شىنىقتىرۋ جانە سپورت باسقارماسىنىڭ باسپا ءسوز قىزمەتىنەن.
«سكايراننينگ» جارىسى تاڭعى ساعات 10:00 دە «شىمبۇلاق» تاۋشاڭعىلى كەشەنىنىڭ ۇلكەن الاڭىندا باستالدى.
ارتىنشا، وسى الاڭدا «نۇرسۇلتان-2016» الپينياداسىنىڭ سالتاناتتى اشىلۋ ءراسىمى ءوتتى. وعان الماتى قالالىق دەنە شىنىقتىرۋ جانە سپورت باسقارماسى مەن قازاقستاننىڭ الپينيزم فەدەراتسياسىنىڭ وكىلدەرى جانە قازاقستان ءالپينيزمىنىڭ ارداگەرلەرى قاتىستى.
ءوزىنىڭ كىرىسپە سوزىندە قازاقستاننىڭ الپينيزم فەدەراتسياسىنىڭ پرەزيدەنتى، الماتى قالاسىنىڭ دەنە شىنىقتىرۋ جانە سپورت باسقارماسى باسشىسىنىڭ مىندەتىن اتقارۋشى رۇستەم بايسەيىتوۆ قاتىسۋشىلاردى «نۇرسۇلتان-2016» الپينياداسىمەن قۇتتىقتاپ، قاتىسۋشىلارعا ساتتىلىك تىلەدى.
بۇدان كەيىن انيماتورلار توبى وزدەرىنىڭ اۆتورلىق شوۋ- باعدارلاماسىن كورسەتتى جانە جاس ەسترادا انشىلەرى مەن بيشىلەرىنىڭ قاتىسۋىمەن كىشىگىرىم كونتسەرت بولدى. مادەني شارا كوڭىلدى فلەشموبپەن اياقتالدى.
نۇرسۇلتان شىڭىنا شىعۋ جانە «سكايراننينگ» جارىسى كۇندىزگى ساعات 14:00 دە اياقتالدى. كەيىن، قاتىسۋشىلارتالعار اسۋىنان تومەن قاراي تۇسە باستادى.
ال تۇستەن كەيىن ساعات 16:00 دە «شىمبۇلاق» تاۋشاڭعىلى كەشەنىندە ماراپاتتاۋ ءراسىمى بولدى.
سونىمەن، «سكايراننينگتەن» اۋەسقويلار كاتەگورياسى بويىنشا ەرلەر اراسىندا ءبىرىنشى ورىندى رينات حالفين جەڭىپ الدى. ەكىنشى ورىندى ۆلاديمير مەلسيتوۆ يەلەنسە، ءۇشىنشى ورىن ن. وسمانوۆقا بۇيىردى.
ايەلدەر اراسىندا يۋليا پولياكوۆانىڭ باعى جانىپ، ءبىرىنشى ورىندى جەڭىپ الدى. ايجان جانباتىر ەكىنشى ورىنعا كوتەرىلدى. ال ناتاليا مامەتينا ءۇشىنشى ورىنعا تۇراقتادى. جۇلدەگەرلەرگە ديپلومدار مەن ەستەلىك سىيلىقتار تابىس ەتىلدى.
ال «نۇرسۇلتان-2016» الپينياداسىنا قاتىسۋشىلاردىڭ بارلىعىنا جاپپاي شىڭعا شىعۋ شاراسىنا قاتىسقاندىقتارى تۋرالى ارنايى سەرتيفيكاتتار بەرىلدى.
«سپورتتىق الماتى» كەڭ كولەمدى قالالىق باعدارلاماسى اياسىندا ۇيىمداستىرىلعان بۇل يگى شارانى وتكىزۋدەگى ماقسات - بۇقارالىق سپورتتى دامىتۋ جانە سالماتتى ءومىر سالتىن ناسيحاتتاۋ.
ەستەرىڭىزگە سالا كەتەلىك، شىڭعا ورلەۋ بۇگىن تاڭعى ساعات 05:00 دە كەلەسى باعىت بويىنشا جۇرگىزىلدى: مەدەۋ (1600م) - شىمبۇلاق (2380م) - تالعار اسۋى (3200م) - بوگدانوۆيچ مۇزدىعى - كومسومول اسۋى (4000م) - نۇرسۇلتان شىڭى (4376م).
ءىس- شارانى ۇيىمداستىرۋشىلار: الماتى قالاسىنىڭ دەنە شىنىقتىرۋ جانە سپورت باسقارماسى جانە ق ر الپينيزم جانە قۇزعا ورمەلەۋ فەدەراتسياسى.
اۆتور: ايبوتا جاپپاربەرگەن