استانادا ۇلى ابايدىڭ 172 جىلدىعى اتالىپ ءوتتى
«اباي الەمى جانە رۋحاني جاڭعىرۋ» تاقىرىبىنداعى اۋقىمدى شاراعا ءبىرقاتار زيالى قاۋىم وكىلدەرى قاتىستى، دەپ حابارلايدى «قازاقپارات» ح ا ا ءتىلشىسى.
ۇلى ابايدىڭ تۋعان كۇنى 10-ەمەس، 23- تامىزدا ەكەنىن بۇل كۇندە زيالى قاۋىم وكىلدەرىنەن باستاپ ءبارى دە مويىنداپ قويعان.
ۇلتتىڭ قامى ءۇشىن قايىسپاعان قايىم مۇحامەدحانوۆ، ابايتانۋشى توكەن يبراگيموۆتىڭ تۇجىرىمدارى ابايدىڭ شىنىندا دا، ءدال بۇگىن ومىرگە كەلگەنىن دالەلدەپ بەرە الادى. وسى تۋراسىندا ءسوز قوزعاعان استانا قالاسىنىڭ تىلدەردى دامىتۋ باسقارماسىنىڭ باس مامانى ەرجان ەڭسەبايەۆ بۇگىنگى شارا تۋرالى ءسوز قوزعاي كەلە، ابايدىڭ رۋحاني مەكتەبىن ناسيحاتتاۋ جۇمىسى جالعاسىن تاۋىپ جاتقانىن اتاپ ءوتتى.
«بۇگىن ۇلى اباي اتامىزدىڭ تۋعان كۇنى. رۋحاني جاڭعىرۋدىڭ نەگىزى ابايدان باستالاتىنىن حالىققا پاش ەتۋ ماقساتىندا ءىس-شارا ۇيىمداستىردىق. ەڭ باستى ماقساتىمىز - ابايدىڭ تۋعان كۇنى 23- تامىز بولعاندىقتان، وسى ءبىر داتانى بەكىتۋدى كوزدەپ وتىرمىز. سەبەبى، 1917-جىلى كۇنتىزبە اۋىسقاندىقتان، ابايدىڭ تۋعان كۇنى 10- تامىز ەمەس، 23- تامىزعا تۋرا كەلەدى. سوڭعى 6 جىلدىڭ ىشىندە ابايدىڭ تۋعان كۇنىن 23- تامىزدا اتاپ ءوتىپ ءجۇرمىز. جيدەبايدىڭ جانە سەمەيدەگى «جيدەباي-ءبورىلى» مۇراجايىنداعى رەسمي قۇجاتتار سولاي ايتسا، عالىمدار مەن زەرتتەۋشىلەر، زيالى قاۋىم وكىلدەرى تۇجىرىمداسا تالاس جوق دەپ ويلايمىن. ءبىر داتاعا توقتاۋ كەرەك»، - دەيدى ەرجان ەڭسەبايەۆ.
«اباي الەمى جانە رۋحاني جاڭعىرۋ» تاقىرىبىنداعى شارا ق ر ءدىن ىستەرى جانە ازاماتتىق قوعام ۆيتسە-ءمينيسترى ابزال نۇكەنوۆتىڭ، استانا قالاسى اكىمىنىڭ ورىنباسارى ەرمەك امانشايەۆتىڭ ەسكەرتكىشتىڭ الدىنا گۇل شوقتارىمەن قويۋىمەن باستالدى.
ىزىنشە استانا قالاسىنىڭ مەملەكەتتىك فيلورمونياسىنىڭ فولكلورلىق توبى ابايدىڭ اۋەزدى اندەرىن ورىنداسا، ايتىسكەر اقىن امانجول ءالتاي ۇلى ۇلى باباعا ارناپ ارناۋ ايتتى.
ارمان شەريزات، جۇلدىزاي ىسقاق، مەرەي قارتوۆ قاتارلى رەسپۋبليكاعا تانىمال اقىندار اقىنعا ارناعان ارناۋ ولەڭدەرىمەن كوپشىلىكتىڭ زور قوشەمەتىنە يە بولدى. ساحناعا اباي وبرازىندا شىققان قاسىمحان بۇعىبايدىڭ مونولوگى جيىلعان جۇرتتى ويسىز قالدىرماعانى انىق.
ارتىنشا، بەلگىلى ءداستۇرلى ءانشى ەرلان رىسقالي «سەگىز اياقتى» ورىندادى. «ابايدىڭ قايتقان كۇنىنەن قانشاما الىستاساق، ونىڭ رۋحىنا سونشالىقتى جاقىنداي تۇسەمىز. اباي اتامىزدىڭ قۇندىلىعىن بۇدان دا جوعارى حالىقارالىق دەڭگەيدە ناسيحاتتاۋ كەرەك دەگەن ويدامىن. كەيدە اقىننىڭ كورەگەندىگى مەن ۇلىلىعى ماعان بۇگىنگى كۇندى بولجاي بىلگەندەي كورىنەدى. جاستاردىڭ رۋحى بيىك بولسىن، سانالى بولسىن دەگەن ناسيحاتى تاۋەلسىزدىگىمىزدىڭ تۇسىندا ورىندالىپ جاتقان سەكىلدى. رۋحانياتسىز حالىق بولمايدى. اباي اتامىزدىڭ ۇلىلىعىن باسقالار دا تانىپ جاتىر. بىزدەن تىلەك - اقىننىڭ مۇرالارىن ناسيحاتتاۋ جۇمىسى اۋقىمدى بولا تۇسسە دەيمىز»، - دەيدى شاراعا كەلگەن اكتەر ەرىك جولجاقسىنوۆ.
اۆتور: ايان بەكەن ۇلى