جەتىسۋ وبلىسىندا زاڭسىز جۇمىس ىستەگەن 170 شەتەلدىك جاۋاپقا تارتىلدى

None
تالدىقورعان. قازاقپارات - جەتىسۋ وبلىسىندا زاڭسىز جۇمىس ىستەگەن 170 شەتەلدىك ازامات جاۋاپقا تارتىلدى.

ماسەلەن، تەكەلى قالاسىنداعى قۇرىلىس وبەكتىسىنەن زاڭسىز جۇمىس ىستەگەن 15 ميگرانت ۇستالدى، دەپ حابارلايدى قازاقپارات ءتىلشىسى.

جەتىسۋ وبلىسىنىڭ پوليتسەيلەرى «زاڭسىز كەلۋشى» پروفيلاكتيكالىق ءىس-شاراسىنىڭ اياسىندا كوشى-قون زاڭناماسى بويىنشا بۇزۋشىلىقتاردى انىقتاۋدى كۇشەيتتى. ءۇش كۇن ىشىندە وبلىستا 243 ادام جاۋاپقا تارتىلدى، ونىڭ ىشىندە 170 شەتەلدىك ازامات بار.

تەكەلى قالاسىنداعى قۇرىلىس وبەكتىلەردىڭ بىرىندە جۇرگىزىلگەن رەيد بارىسىندا كورشى مەملەكەتتىڭ 15 ازاماتىنان تۇراتىن توپ ۇستالدى. شەتەلدىكتەردىڭ ەشقايسىسى ەڭبەك قىزمەتىن جۇزەگە اسىرۋعا قانداي دا ءبىر رۇقسات قۇجاتتى كورسەتە المادى. وسىعان بايلانىستى ءاربىر ۇستالعانعا قاتىستى جيناقتالعان ماتەريالدار سوتتىڭ قاراۋىنا جىبەرىلدى.

تيىسىنشە سوت ءتارتىپ بۇزۋشىلارعا جازا قولدانۋ نەمەسە ەلدەن شىعارۋ تۋرالى شەشىم قابىلداۋى كەرەك. ولاردى جۇمىسقا قابىلداعان 37 جاستاعى ازاماتقا ايىپپۇل سالىندى.

«سوت شەشىمىمەن كوشى-قون زاڭناماسىن بۇزعانى ءۇشىن 7 شەتەل ازاماتى ەلدەن شىعارىلدى. جەكە باسىن انىقتاۋ مەن راستاۋعا قاتىستى قۇجاتتارىنىڭ جوق بولۋىنا جانە تاعى دا باسقا ماسەلەلەرگە بايلانىستى 47 شەتەلدىك ازامات قابىلداۋ-ءبولۋ پۋنكتىنە ورنالاستىرىلدى. جەرگىلىكتى تۇرعىنداردىڭ بىرىنە زاڭسىز كوشى-قوندى ۇيىمداستىردى دەگەن كۇدىك بويىنشا قىلمىستىق ءىس قوزعالدى»، - دەدى كوشى-قون قىزمەتى باسقارماسىنىڭ باستىعى ەرلان رايىمبەكوۆ.

سوڭعى جاڭالىقتار