12:51, 13 - اقپان 2022 | GMT +5
ۇستالعانداردى ازاپتاعان پوليتسەيلەردىڭ ۇستىنەن 170 قىلمىستىق ءىس قوزعالعان
نۇر-سۇلتان. قازاقپارات - قاڭتار وقيعاسىندا ۇستالعانداردىڭ تۇلعاسى انىقتالعان سوڭ، سونداي-اق دەنساۋلىق جاعدايلارىنا بايلانىستى جانە باسقا دا ماتەريالدار بويىنشا 109 ازاماتتىڭ قاماۋعا الۋ جازاسى كەتىپ قالماۋ جونىندەگى قولحاتپەن جانە جەكە كەپىلدىك بەرۋمەن الماستىرىلعان، دەپ حابارلايدى قازاقپارات.
بۇل جايىندا پرەزيدەنتتىڭ توراعالىعىمەن وتكەن قاۋىپسىزدىك كەڭەسىنىڭ وتىرىسىندا ءمالىم بولدى .
پروكۋرورلار ازاماتتاردىڭ تارتىپسىزدىككە قاتىسى بار ەكەنى دالەلدەنبەگەنىن نەگىزگە الا وتىرىپ، تاعى دا 103 ادامدى بوساتقان. ۇستالعانداردى ازاپتاۋ تۋرالى ءاربىر حابارلاما ءجىتى تەكسەرىلەدى.
پروكۋرورلار ادۆوكاتتارمەن، قۇقىق قورعاۋشىلارمەن جانە ادام قۇقىقتارى جونىندەگى ۋاكىلمەن ءاردايىم بايلانىستا. ولارعا تەرگەۋ يزولياتورلارىنا، ۋاقىتشا ۇستاۋ يزولياتورلارىنا جانە ۇستالۋ سەبەبىن انىقتايتىن ارناۋلى ورىندارعا كىرۋگە مۇمكىندىك بەرىلگەن.
جالپى پروكۋراتۋراعا ۇستالعاندار تاراپىنان 305 شاعىم تۇسكەن. قۇقىق بۇزۋشىلىققا قاتىستى 62 شاعىم راستالمادى.
ازاپتاۋ جانە بيلىگىن اسىرا پايدالانۋ دەرەگى بويىنشا 170 قىلمىستىق ءىس قوزعالدى.
