ەلوردادا 170 مىڭعا جۋىق جولاۋشى قوعامدىق كولىك اقىسىن تولەمەي جۇرگەن
بۇل تۋرالى City Transportation Systems ج ش س كولىكتىك باقىلاۋ دەپارتامەنتىنىڭ مەنەدجەرى ازات تولەۋبايەۆ ءمالىم ەتتى، دەپ حابارلايدى قازاقپارات ءتىلشىسى.
«بيىل جىل باسىنان بەرى كولىكتىك باقىلاۋ دەپارتامەنتىنىڭ قىزمەتكەرلەرى قوعامدىق كولىك اقىسىن تولەمەگەن 170 مىڭعا جۋىق جولاۋشىنى انىقتادى. ونىڭ ىشىندە 8 مىڭ ادامعا اكىمشىلىك حاتتاما تولتىرىلىپ، ايىپپۇل سالىندى. جول اقىسىن تولەمەگەنى ءۇشىن 2 ا ە ك نەمەسە 5834 تەڭگە كولەمىندە ايىپپۇل قاراستىرىلعان»، - دەدى ازات تولەۋبايەۆ.
سونداي-اق، CTS وكىلى اۆتوبۋس اقىسىن تولەمەگەن 170 مىڭعا جۋىق جولاۋشىنىڭ نەلىكتەن تەك 8 مىڭى عانا جاۋاپقا تارتىلعانىن ايتتى.
«بۇل جەردە ماسەلە ادامگەرشىلىكتە. كەي جولاۋشىلار تولەماقى جاساۋدى ۇمىتىپ كەتەدى، كەيبىرىنىڭ ينتەرنەتى ىستەمەي قالادى، تاعى سول سياقتى. ونداي جاعدايدا تۇسىنىستىكپەن قاراپ، ەسكەرتۋ جاساي وتىرىپ، جولاقىنى تولەۋىن سۇرايمىز. جالپى ءبىزدىڭ مىندەت - قوعامدىق كولىك اقىسىن تولەمەگەن جولاۋشىنى انىقتاۋ عانا، ودان ءارى ماسەلەمەن ءتارتىپ ساقشىلارى اينالىسادى»، - دەيدى ول.
ونىڭ ايتۋىنشا، اۆتوبۋس اقىسىن كوبىنە جاستار جاعى تولەمەي جاتادى. بۇعان دەيىن CTS باسشىسى ەلوردانىڭ قوعامدىق كولىكتەرىندە Ashyq جۇيەسى ەنگىزىلە مە دەگەن ساۋالعا قاتىستى پىكىر ءبىلدىردى. سونداي-اق، نۇر-سۇلتان قالاسىندا قوعامدىق كولىك اقىسىن تولەۋدىڭ جاڭا جۇيەسى ەنگىزىلەتىنى حابارلاندى. ودان بولەك، ەلوردادا قوعامدىق كولىك اقىسىن تولەمەي جۇرەتىن جولاۋشىلاردىڭ ۇلەسى تۋرالى ايتىلدى.
اۆتور: ءالي يبرايەۆ
