وڭتۇستىك قازاقستاندا 170 مىڭعا جۋىق كوپبالالى انا بار - فوتو
وبلىس ارداگەرلەرى مەن زيالى قاۋىم وكىلدەرى، وبلىستىق اسسامبلەيا وكىلدەرى، وبلىس اكىمىنىڭ جانىنداعى ايەلدەر ىستەرى جانە وتباسىلىق - دەموگرافيالىق ساياسات جونىندەگى كوميسسيا مۇشەلەرى، وبلىستىڭ اۋدان، قالالارىنان ءتۇرلى سالادا قىزمەت ەتەتىن قىز-كەلىنشەكتەر سىندى جالپى سانى 200 گە جۋىق نازىك جاندى ازاماتتار قاتىسقان بەيرەسمي وتىرىستى ءوڭىر باسشىسى جانسەيىت تۇيمەبايەۆ اشىپ بەرىپ، ارۋ انالاردى كوكتەمنىڭ كەرەمەت مەيرامىمەن قۇتتىقتادى.
«ءبىزدىڭ قازىرگى قوعامىمىزدا ايەل تەك وتباسىنىڭ بەرەكە-بىرلىگىن ويلايتىن تۇلعا عانا ەمەس، ول مەملەكەتتىك جانە ساياسي ماسەلەلەرگە بەلسەنە ارالاساتىن قوعام مۇشەسى. سوندىقتان ەلىمىزدە ايەل ادامنىڭ الەۋمەتتىك قورعالۋىنا، ولاردىڭ ءومىر ءسۇرۋ دەڭگەيىن ارتتىرۋعا ايرىقشا ماڭىز بەرىلەدى. اتا-بابالارىمىز ەجەلدەن قىزدارىن قۇرمەتتەگەن. كەلىندەرى مەن جارلارىن سىيلاعان. «جۇماق انانىڭ تابانىنىڭ استىندا»، «قىز وسسە - ەلدىڭ كوركى» دەپ جوعارى باعالاعان». قىمباتتى حانىمدار! سىزدەردىڭ اتتارىڭىزعا ايتىلاتىن العىستار مەن جىلى سوزدەر ەش ۋاقىتتا تولاستاماسىن. كوكتەمنىڭ شۋاقتى كۇندەرىندەي ءاردايىم كورىكتى بولىپ جۇرە بەرىڭىزدەر»، - دەدى ج. قانسەيىت ۇلى.
مۇنان سوڭ، ايماق باسشىسى ءۇيدىڭ دە، ءتۇزدىڭ جۇمىسىن قاتار الىپ، قوعامدا ايرىقشا بەلسەندىلىگىمەن كوزگە ءتۇسىپ جۇرگەن 32 ايەلدى ماراپاتتاپ، ونىڭ ۇشەۋىنە «وبلىسقا سىڭىرگەن ەڭبەگى ءۇشىن» بەلگىسىن بەرسە، 12 نە وبلىس اكىمىنىڭ گراموتاسىن، تاعى 12 نە وبلىس اكىمىنىڭ العىس حاتىن تابىستادى. ال 5 انانى «التىن القا» توسبەلگىسىمەن ماراپاتتادى. سونداي-اق، بۇگىنگى شاراعا كەلگەن بارلىق ايەلدەرگە اكىمنىڭ شاعىن سىيى بەرىلدى.
سونىمەن بىرگە، مەرەكەلىك وتىرىستا وبلىستىق ءماسليحاتتىڭ حاتشىسى ق. بالابيەۆ پەن وبلىستىق جانار-جاعارماي قاۋىمداستىعىنىڭ ءتوراعاسى ق. قامباروۆ قۇتتىقتاۋ ءسوز سويلەپ، شارا سوڭى تەك نازىك جاندىلارعا ارنالعان ولەڭ، بيمەن جالعاستى. مەرەكەلىك كەزدەسۋدە نازىك جاندىلارعا جاسالعان توسىن سىيدىڭ ءبىرى وبلىستىق باسقارما باسشىلارىنىڭ سىيى ەدى.
باسقارما جەتەكشىلەرى، جيىندا، ساحناعا شىعىپ، ايەلدەردىڭ قۇرمەتىنە حورمەن ءان ايتىپ بەردى.
ايتا كەتۋ كەرەك، بۇگىندە وبلىستا 1 ميلليون 440 مىڭ ايەل ازاماتتارى ءومىر سۇرسە، ولاردىڭ 267 ءى عىلىم دوكتورى، 1458 ءى عىلىم كانديداتى، 214 ءى پروفەسسور، 604 ءى دوتسەنت. ال 2676 نازىك جاندى مەملەكەتتىك قىزمەتكەر بولىپ تابىلادى.
ايەل ازاماتتار وبلىستاعى مەملەكەتتىك قىزمەتشىلەردىڭ 30,7 پايىزىن، ءبىلىم سالاسىنداعى پەداگوگتاردىڭ 76,8 پايىزىن، دەنساۋلىق ساقتاۋ سالاسىنداعى قىزمەتكەرلەردىڭ 86 پايىزىن قۇراپ وتىر.
وبلىسىمىزدا ومىرگە ۇرپاق اكەلىپ، ولاردى تاربيەلەپ وسىرۋدە ۇلگى-ونەگە بولىپ جۇرگەن «التىن قۇرساقتى» انالار جەتكىلىكتى. رەسپۋبليكاداعى ءاربىر بەسىنشى بالا وڭتۇستىك قازاقستان وبلىسىندا دۇنيەگە كەلەتىنى بارشاعا ءمالىم. بۇگىندە وڭىرىمىزدە 169330 كوپ بالالى انالار ەسەپتە تۇرادى.
ولاردىڭ 6157 ءسى «باتىر انالار»، 25426 ى «التىن القا»، 34756 ى «كۇمىس القا» يەگەرى. ال، 8791 انا 1-ءشى جانە 2- ءشى دارەجەلى «انا داڭقى» وردەنىمەن ماراپاتتالعان.
