ەرلەر مەن ايەلدەر اراسىنداعى ەكونوميكالىق تەڭدىككە جەتۋ ءۇشىن 170 جىل كەرەك
بۇل تۋرالى كەشە بۇكىل الەمدىك ەكونوميكالىق فورۋمدا ايتىلدى، دەپ حابارلايدى Reuters اگەنتتىگى.
بۇكىل الەمدىك ەكونوميكالىق فورۋمنىڭ نەگىزىن سالۋشى ءارى اتقارۋشى ءتوراعاسى كلاۋس شۆاب «ايەلدەر مەن ەرلەر الەممەن بەتپە-بەت كەلگەن قۇبىلىستارعا بىردەي توتەپ بەرۋ كەرەك، ءارى بارلىق سالادا تەڭ بولۋى كەرەك»، - دەدى. سونداي-اق كەشە بۇكىل الەمدىك ەكونوميكالىق فورۋم ايەلدەردىڭ ءبىلىم الۋى، دەنساۋلىعى، ءومىر ءسۇرۋ ۇزاقتىعى، ەكونوميكالىق مۇمكىندىكتەرى مەن ساياسي قۇقىقتارى بويىنشا 144 مەملەكەتتىڭ ىشىندە جۇرگىزگەن رەيتينگ قورىتىندىسىن جاريالادى.
جالپى كورسەتكىشتە العاشقى بەستىكتە يسلانديا، فينليانديا، نورۆەگيا، شۆەتسيا، الەم بويىنشا پارلامەنتتە ايەلدەردى ەڭ كوپ قامتىعان رۋاندا تۇر. العاشقى وندىققا يرلانديا، فيليپپين، سلوۆەنيا، جاڭا زەلانديا، نيكاراگۋا ەنگەن. سوڭعى ورىنداردا يران، يەمەن، ساۋد ارابيا، پاكىستان مەن سيريا تۇر.
قازاقستان بۇل تىزىمدە اۋستريا مەن يتاليانىڭ ورتاسىندا 51-ورىنعا جايعاسقان. رەيتينگتىڭ بولىمدەرىندە ەكونوميكالىق مۇمكىندىكتەرى بويىنشا 31، ءبىلىم دەڭگەيى بويىنشا - 58، دەنساۋلىق ساقتاۋ، ءومىر ءسۇرۋ ۇزاقتىعى كورسەتكىشىندە ءبىرىنشى، ساياسي ومىرگە ارالاسۋىندا 77 -ورىندا تۇر.
ءبىر ايتا كەتەرلىگى، جالپى كورسەتكىشتە قازاقستان رەسەي (75)، قىرعىزستان (81)، جاپونيانى (111) ارتقا تاستاعان.
