سەيفۋللين اۋىلىنداعى جانجال: قاۋىپسىزدىكتى ساقتاۋعا ىشكى ىستەر ورگاندارىنىڭ 170 قىزمەتكەرى جۇمىلدىرىلدى

 استانا. قازاقپارات - كەشە وڭتۇستىك قازاقستان وبلىسى ماقتاارال اۋدانىنىڭ تاجىك اعايىندار كوپ تۇراتىن سەيفۋللين اۋىلىندا تۇرعىندار اراسىندا بۇزاقىلىق ءىس- ارەكەتتەر ورىن الدى.

ءۇش تۇرعىن دەنە جاراقاتتارىن الىپ، دۇكەندەردىڭ ءبىرىنىڭ تەرەزەسى سىندى، دەپ حابارلايدى otyrar.kz وبلىستىق ىشكى ىستەر دەپارتامەنتىنىڭ باسپا ءسوز قىزمەتىنە سىلتەمە جاساپ.

«بۇزاقىلىق ارەكەتتەردىڭ ورىن الۋىنا سەيفۋللين اۋىلى تۇرعىنىنىڭ كامەلەت جاسقا تولماعان قىزىنا سەكسۋالدى سيپاتتاعى ارەكەتتەر جاسالدى دەگەن كۇدىگى سەبەپ بولعان. اتالعان جايت سوتقا دەيىنگى ءبىرىڭعاي تەرگەپ- تەكسەرۋ تىزىلىمىنە تىركەلىپ، قىلمىستى كودەكستىڭ 121-بابى، 4-بولىمىمەن ءىس قوزعالدى.

 اتا- اناسىنىڭ باقىلاۋىمەن دارىگەرلەر جاس قىزدىڭ دەنەسىنىڭ ينتيمدى جەرلەرىن تەكسەرىپ شىققاندا ونىڭ دەنەسىنەن پاتولوگياسى مەن دەنە زاقىمدارى انىقتالمادى. سوت- مەديتسينالىق جانە پسيحولوگيا- پسيحوتريالىق ساراپتامالار تاعايىندالدى. كۇدىكتى اتا- اناسىنىڭ جاۋاپكەرشىلىگىنە بەرىلدى.

ال ءبىر توپ ازاماتتاردىڭ بۇزاقىلىق ءىس- ارەكەتتەرىن تەرگەۋ بويىنشا اۋداندىق كريميناليستەر جانە تەرگەۋشىلەردەن جەدەل- تەرگەۋ توبى قۇرىلدى. اۋىلعا قوعامدىق قاۋىپسىزدىكتى ساقتاۋ ماقساتىندا ىشكى ىستەر ورگاندارىنىڭ 170 قىزمەتكەرى جۇمىلدىرىلدى.

1- تامىزدا وڭتۇستىك قازاقستان وبلىسى اكىمىنىڭ، وبلىس پروكۋرورىنىڭ، ىشكى ىستەر دەپارتامەنتى باستىعىنىڭ ورىنباسارلارى سەيفۋللين اۋىلىنىڭ تۇرعىندارىمەن جيىن وتكىزدى. قۇقىق قورعاۋ جانە مەملەكەتتىك ورگاندار، ازاماتتىق قوعام ينستيتۋتتارىنىڭ بىرلەسكەن ءىس- ارەكەتتەرىنىڭ ناتيجەسىندە تارتىپكە قارسى ءىس- ارەكەتتەر شەكتەلىپ، توقتاتىلدى. جاعداي باقىلاۋدا» دەلىنگەن حابارلامادا.