ماليدە 170 ادام كەپىلگە الىنعان قوناقۇيدە ارنايى وپەراتسيا ءجۇرىپ جاتىر
كەپىلگە الىنعان ءۇش ادامنىڭ قازا بولعانى جايلى مالىمەت رەسمي تۇردە راستالىپ وتىر - ولاردىڭ ىشىندە ەكى ماليلىك جانە ءبىر فرانسيا ازاماتى. سونىمەن قاتار، قوناق ۇيدەن 20 ادامنىڭ شىعارىلعانى بەلگىلى. الدىن الا مالىمەت بويىنشا، كەپىلگە الىنعانداردىڭ ىشىندە Turkish Airlines اۋە تاسىمالداۋشىسىنىڭ قىزمەتكەرلەرى، قىتايدىڭ ونداعان ازاماتى جانە فرانسيا مەن ءۇندىستاننىڭ ازاماتتارى بار.
ەسكە سالايىق، قوناق ۇيدە اتىس تاڭعى ۋاقىتتا بولدى. ب ا ق مالىمەتىنشە، قىلمىسكەرلەر 170 ادامدى قوناق ءۇي ىشىندە كەپىلدىكتە ۇستاپ وتىر. «ولار شامامەن 140 قوناق پەن 30 قىزمەتكەردى ۇستاپ وتىر. وسىلايشا، قوناقۇيگە كىرۋ جولى قورشاۋعا الىنعان، شىعۋعا نەمەسە كىرۋگە مۇمكىندىك جوق»، - دەدى قوناق ۇيلەر توبىنىڭ باسپا ءسوز حاتشىسى. قازىرگى ۋاقىتتا عيمارات ىشىندە اتىس جالعاسىپ جاتىر.
جەرگىلىكتى ب ا ق مالىمەتىنشە، قارۋلى ادامدار قوناق ءۇي تەرريتورياسىنا ديپلوماتيالىق نومەرلەرى كولىكتەرمەن كىرىپ كەتكەن.
ق ر سىرتقى ىستەر مينيسترلىگى مالي استاناسى باماكوداعى Radisson Blu قوناق ۇيىندە قارۋلى ادامدار كەپىلدىككە الىنعانداردىڭ اراسىندا قازاقستاندىقتاردىڭ بار-جوعىن انىقتاپ جاتىر.
