جامبىل وبلىسىندا ۇلى ابايدىڭ 170 جىلدىعىنا فيلم تۇسىرىلۋدە

تاراز. قازاقپارات - قازاقتىڭ ۇلى ويشىلى اباي قۇنانباي ۇلىنىڭ 170 جىلدىعىنا وراي 12 سەريالى تاريحي ەپوپەيا تۇسىرىلۋدە.

«اقىلدىڭ كىلتى» جۇمىس اتاۋىمەن كارتينانى ءتۇسىرۋ «حابار» اگەنتتىگىنىڭ تاپسىرىسىمەن جامبىل وبلىسىندا جۇرگىزىلۋدە.

كوپسەريالى فيلم-ەپوپەيا ХІХ-ХХ عاسىرلارداعى تاريحي وقيعالار ارقىلى بىرنەشە قازاق وتباسىلارىنىڭ تاعدىرى تۋرالى اڭگىمەلەيدى. فيلمنىڭ ءون بويى ابايدىڭ «قارا سوزدەرى» ارقىلى وتەدى.

جوبا اۆتورلارى ۇلى ويشىلدىڭ فيلوسوفيالىق وي- پىكىرلەرىن بارلىق سەريالاردىڭ ءون بويىندا پايدالانۋ وقيعالاردى بەينەلەپ قانا قويمايدى، ونى بۇگىنگى ءبىزدىڭ ومىرىمىزبەن شەندەستىرەدى.

فيلم رەجيسسەرى مۇرات بيدوسوۆتىڭ پىكىرىنشە، ادامزات پروبلەمالارى عاسىرلار بويى وزگەرمەيدى. «ۋاقىت، ورتا، وقيعا ورنى عانا وزگەرەدى. فيلمنىڭ سيۋجەتتىك جەلىسى بۇگىنگى كۇندەرگە دەيىن ولاردىڭ ۇرپاقتارى ارقىلى وتەدى. اكەلەرىندەگى پروبلەمالار بالالارىندا جالعاسادى. فيلمدەگى 12 سەريا - بۇل بىرنەشە وتباسىنىڭ ءبىر عانا ۇلكەن تاريحى. ول اتا- بابا ومىرىنەن باستاۋ الىپ، بۇگىنگى كۇندەرمەن اياقتالادى»، - دەيدى ول.

رەجيسسەر مۇرات بيدوسوۆ ۇلتتىق قاۋىپسىزدىك اگەنتتەرىنىڭ ومىرىنە ارنالعان قازاقستاندىق «اگەنت Z»  سەريالىنىڭ، سونداي- اق قازىرگى قازاق جازۋشىسى دۋلات يسابەكوۆتىڭ شىعارمالارى اۋەنىمەن تۇسىرىلگەن العاشقى وتاندىق سەريال بولعان «اپكە» تەلەجوباسىنىڭ اۆتورى. سونىمەن قاتار م. بيدوسوۆ وپەراتور ەرلان شالبايەۆپەن بىرگە «حابار» ارناسىندا «اق سۇڭقار»، «تەمىرتاۋ كوكتەمى»، «باقىت قۇسى»، «تاڭداۋ» فيلمدەرىن ءتۇسىردى.