بەيجىڭدە ابايدىڭ تۋعانىنا 170 جىل تولۋى اتالىپ ءوتتى - فوتو، كەسكىن
قىتايدىڭ ۇلتتار مۇراجايى سارايىندا ابايدىڭ ولەڭدەرى مەن قارا سوزدەرى ورىندالىپ، اندەرى شىرقالدى، جيىنعا قاتىسقاندار ۇلى اقىن جانە ويشىل اباي ءومىرى تۋرالى سۇراق-جاۋاپ ويىنىنا قاتىستى.
«اباي مۇراسى - قازاق حالقىنىڭ رۋحاني قازىناسى، ول اقىن، مۋزىكانت، فيلوسوف، ادەبيەتشى بولدى. ءبىزدىڭ جاستارىمىز بىلىمگە ۇمتىلۋى، اباي تاعىلىمىن زەردەلەۋى ءتيىس»، - دەدى كەش قوناعى، بەلگىلى جازۋشى قىتاي حالىقتىق ساياسي كونسۋلتاتيۆتىك كەڭەستىڭ مۇشەسى اكبار ءماجيت.
دۇنيەجۇزىلىك كۇرەس فەدەراتسياسىنىڭ مۇشەسى، شىنجاڭ-ۇيعىر اۆتونوميالىق ولكەسى قۇراماسىنىڭ جاتتىقتىرۋشىسى ايدارحان قابىلدوللا ۇلى ءوزىنىڭ 1995-جىلى قازاقستاندا وتكەن ابايدىڭ 150 جىلدىعىن مەرەكەلەۋگە قاتىسقانىن ەسكە الدى. «سول كەزدە قازاقستاننىڭ ەكونومكالىق جاعدايى كۇردەلى بولسا دا، ەل الەمنىڭ تۇپكىر-تۇپكىرىنەن قوناقتار شاقىرىپ، ابايدىڭ 150 جىلدىعىن جوعارى دارەجەدە وتكىزدى»، - دەدى ول.
قىتاي ورتالىق راديوسىنىڭ ديكتورى بالاپان رابات قازاقستاندىق جۋرناليستەرگە بەرگەن ءوزىنىڭ سۇحباتىندا اباي ەڭبەكتەرى مەن يدەيالارىن تاراتۋ جانە ونى جۇزەگە اسىرۋ قازاق حالقىن جانە ونىڭ مادەنيەتىن ويداعىداي ساقتاپ قالۋدىڭ مىندەتتى شارتى دەگەن پىكىرىن جەتكىزدى. «بىزگە تەمىر جولدار، ساۋدا جانە ەكونوميكانىڭ باسقا دا اسپەكتىلەرى قاجەت شىعار، ءبىراق تا ءبىز رۋحىمىزدى جوعالتساق، حالىق بولىپ قالا المايمىز»، دەپ اتاپ كورسەتتى ول.
«ءبىز ستۋدەنت بولساق تا، اباي وسيەتتەرىن ۇستانامىز، اباي بۇكىل قازاق حالقىنىڭ ۇلى اقىنى»، - دەدى قازاقپارات تىلشىسىنە سۇحباتىندا قىتايداعى قازاق ستۋدەنتتەر بىرلەستىگىنىڭ ءتوراعاسى قايشاننۇر قىزىر.
ق ح ر تەلەگراف جانە پوچتا ۋنيۆەرسيتەتىنىڭ دايارلىق كۋرسىنىڭ ستۋدەنتى ايبىن ەربول ۇلى سالتاناتتى كەشكە اقىننىڭ دانىشپان ويلارى جازىلعان كارتينالار مەن پلاكاتتاردى ازىرلەدى. «اباي قازاق حالقىنىڭ عانا ەمەس، بۇكىل الەمنىڭ كورنەكتى ويشىلدارىنىڭ ءبىرى، ونىڭ ءومىرى مەن شىعارماشىلىعى - بۇكىل الەمدىك مۇرا. بۇل شارا مەنىڭ ءبىزدىڭ حالقىمىز ءۇشىن ماقتانىشىمدى ارتتىردى»، - دەدى ول قازاقپارات تىلشىسىنە بەرگەن سۇحباتىندا.
ەسكە سالا كەتەيىك، قىتايداعى قازاق ستۋدەنتتەرىنىڭ بىرلەستىگىنە قازاق دياسپوراسى وكىلدەرىنەن 15 مىڭنان استام ق ح ر ازاماتتارى كىرەدى.
