اباي قۇنانباي ۇلىنىڭ 170 جىلدىق مەرەيتويىنا ارنالعان اقىندار ايتىسىنىڭ جەڭىمپازدارى انىقتالدى - فوتو
جىر دوداسىنا قىزدار ۋنيۆەرسيتەتى، اباي اتىنداعى قازاق ۇلتتىق پەداگوگيكالىق ۋنيۆەرسيتەتى، ت. جۇرگەنوۆ اتىنداعى قازاق ۇلتتىق ونەر اكادەمياسى، ءال-فارابي اتىنداعى قازاق ۇلتتىق ۋنيۆەرسيتەتى جانە الماتى قالاسى جوعارعى وقۋ ورىندارىنان ىرىكتەلىپ الىنعان كىل جۇيرىك، ءسوز قادىرىن بىلەتىن، ابايدى ءپىر تۇتقان جاستار قاتىستى.
سۋىرىپ-سالما ءسوز سايىسىنا الدىن الا جەرەبە تارتۋ ءراسىمى بويىنشا ىرىكتەۋدەن ءوتىپ، شەشۋشى كەزەڭگە زەردەلى سوزىمەن، مانەرلى ماقامى، سۋىرىپسالما اقىندىعىمەن جولداما العان 8 ۇزدىك اقىن باق سىناستى.
تۇيتكىلدى ماسەلەلەردى تىلگە تيەك ەتكەن جاس اقىندار ھاكىم ابايدىڭ 170 جىلدىعىن جىرعا قوسا وتىرىپ، اباي شىعارمالارىنىڭ نەگىزگى تاقىرىبى ۇلت، ۇرپاق تاربيەسى، ادامگەرشىلىك پەن ازاماتتىق، ادىلدىك پەن ادالدىق، يماندىلىق پەن پاراساتتىلىق، دوستىق پەن ماحاببات تاقىرىپتارىن ولەڭ-جىرعا قوستى. جاستار ءوزارا جاراسىمدى ءازىل-قالجىڭ، قاعىتپالار مەن ورامدى وي، تولعاقتى تۇيىندەرگە توقتالىپ، سۇلۋ ءسوزدىڭ كەرەمەتىن كورسەتىپ، ايتىس دەسە ىشكەن اسىن جەرگە قوياتىن ولەڭقۇمار قاۋىمدى ءبىر جەلپىنتىپ تاستادى. شابىتى شارىقتاعان ءسوز ساردارلارى ويناقى ورام، سۋىرىپسالما ونەرلەرىمەن ايتىستى دۋماندى كەشكە اينالدىردى.
ايتىسكەرلەردىڭ ونەرى اشىق تۇردە 5 تەن 10 عا دەيىنگى ۇپايمەن باعالاندى.
ايتىستىڭ قورىتىندىسى بويىنشا باس جۇلدەنى سۇلەيمەن دەميرەل ۋنيۆەرسيتەتىنىڭ ستۋدەنتى التىنبەك يبراگيموۆ قانجىعاسىنا بايلادى. I ورىندى ءال-فارابي اتىنداعى قازاق ۇلتتىق ۋنيۆەرسيتەتى اتىنان كەلگەن ايتبەك تۇرسىنبايەۆ جەڭىپ الدى. II ورىن قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ ستۋدەنتى جىبەك شايماردان قىزىنا بۇيىردى.
ال، Ⅲ ورىندى اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ ستۋدەنتى قارۋ نۇرزات يەلەندى. سونىمەن قاتار 4 ىنتالاندىرۋ سىيلىعى تابىس ەتىلدى.
جەڭىمپازداردىڭ بارلىعى ديپلومدارمەن جانە اقشالاي سىيلىقتارمەن ماراپاتتالدى. بۇدان بولەك ارنايى سىيلىق يەلەرىنە سىي-سياپاتتار جاسالدى.
«اباي شىعارماشىلىعىن، ويشىل اقىننىڭ رۋحاني مۇراسىن جاستارعا كەڭىنەن ناسيحاتتاۋ، اقىن شىعارماشىلىعى ارقىلى جاستاردى رۋحاني-ادامگەرشىلىككە، يماندىلىققا، وتانسۇيگىشتىككە تاربيەلەۋ بۇگىنگى شارانىڭ نەگىزگى ماقساتى بولدى. قازاقتىڭ دانىشپان اقىنى اباي قۇنانباي ۇلىنىڭ مەرەيتويى ۋنيۆەرسيتەت دەڭگەيىندە ءتۇرلى باعىتتاردا تويلانۋدا. وقۋ ورىن جىل سايىن «اباي وقۋلارىن» وتكىزۋدى داستۇرگە اينالدىرعان. اباي بۇگىنگى ۇرپاقتىڭ باستى باعدارشامىنا اينالدى، سوندىقتان دا اباي مۇراسىنىڭ جاستارعا كەڭىنەن ناسيحاتتالۋى الداعى ۋاقىتتا دا ءوز جالعاسىن تابادى»، - دەدى شارانىڭ ۇيىمداستىرۋشىسى، قازاق ادەبيەتى كافەدراسىنىڭ اعا وقىتۋشىسى، ايتىس جاناشىرى تۇرسىنباي ءداۋىت ۇلى.
