رەسەيدەن – 170، ۋكراينادان - 7 ادام قازاقستان ازاماتتىعىن الۋعا ءوتىنىش بەرگەن

نۇر- سۇلتان. قازاقپارات - جىل باسىنان بەرى قازاقستانعا رەسەيدەن 130 مىڭعا جۋىق ادام كەلدى، ونىڭ 120 مىڭى كەرى ورالعان. ال ۋكراينانىڭ 3481 ازاماتى ەلدە ءجۇر، دەپ حابارلايدى قازاقپارات ءتىلشىسى.

بۇل تۋرالى ق ر ىشكى ىستەر ءمينيسترىنىڭ ءبىرىنشى ورىنباسارى مارات قوجايەۆ ءماجىلىستىڭ جالپى وتىرىسىندا ايتتى.

«1- قاڭتاردى الساڭىز، قازىر ءبىزدىڭ ەلگە 457 مىڭداي شەتەلدىك كىرىپ وتىر. كوبىنەسە كورشى حالىقتاردان، ەڭ كوبى وزبەكستاننان، ەكىنشى ورىندا رەسەي تۇر. ال 24- اقپاننان 11- ساۋىرگە دەيىن 130 مىڭ رەسەي ازاماتى ەلىمىزگە كىرگەن، 120 مىڭنان استامى شىعىپ كەتكەن»، - دەپ جاۋاپ بەردى م. قوجايەۆ دەپۋتات ساۋالىنا.

ونىڭ ايتۋىنشا، بۇل كورسەتكىش 2021 - جىلمەن سالىستىرعاندا ەكى ەسە ءوسىپ وتىر. ءبىراق 2020-2021 - جىلدارى پاندەميا كەزەڭىندە شەكارالار جابىلعان بولاتىن.

«ونىڭ الدىنداعى 2018-2019 - جىلدارعا قاراساق، ول سيفرلاردان ءالى ءۇش ەسە كەمبىز، ول جىلدارى ءبىرىنشى توقساندا- اق 350-360 مىڭ ادام كىرىپ- شىعىپ وتىرعان. سونداي- اق، بۇگىندە قازاقستاندا ۋكراينانىڭ 3481 ازاماتى ءجۇر. قازىرگى ستاتيستيكاعا سۇيەنسەك، 170 رەسەي ازاماتى، 7 ۋكراينا ازاماتى قازاقستان ازاماتتىعىن الۋعا ءوتىنىش بىلدىرگەن. بۇل ساندار الدىڭعى جىلدارداعى وتىنىشتەرمەن بىردەي، ياعني 2019 - جىلى رەسەيلىكتەر سانى 200-دەن اسسا، قازىر 170 ادام. ۋاقىتشا تۇرۋعا سۇرانعان ادامدار سانى كىشكەنە ارتىپ كەلەدى. بىلتىرعى- الدىڭعى جىلدارعا قاراعاندا 350-400 ادام سۇرانسا، قازىر مىڭنان اسىپ كەتتى، دالىرەك ايتقاندا 1055 رەسەيلىك ۋاقىتشا تۇرۋعا رۇقسات سۇرادى. بۇل ميگراتسيالىق پروتسەستەردىڭ ءبارىن باقىلاپ وتىرمىز»، - دەدى مارات قوجايەۆ.

ايتا كەتەيىك، ءماجىلىس دەپۋتاتتارى «ق ر كەيبىر زاڭنامالىق اكتىلەرىنە حالىقتىڭ كوشى- قونى سالاسىنداعى زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ماقۇلدادى.

اۆتور: ايجان سەرىكجان قىزى