10:50, 23 - شىلدە 2014 | GMT +5
جىل باسىنان بەرى استانا تۇرعىندارىنىڭ سانى 17.5 مىڭعا ارتتى
استانا. قازاقپارات - جىل باسىنان بەرى استانا حالقىنىڭ سانى 17560 ادامعا ارتتى. حالىقتىڭ تابيعي ءوسىمى - 8128 ادامدى، كوشى- قون اعىنى 9432 قۇرادى.
بۇل تۋرالى astana.kz سايتىنا استانا قالاسىنىڭ ستاتيستيكا دەپارتامەنتىنەن حابارلادى.
تاراتىلعان مالىمەتتەرگە سايكەس، ەلوردا حالقىنىڭ سانى ىشكى (9004 ادام) جانە سىرتقى (428 ادام) كوشى- قوننىڭ ەسەبىنەن ارتىپ وتىر. بۇل رەتتە قالاعا نەگىزىنەن اقمولا، وڭتۇستىك قازاقستان جانە قاراعاندى وبلىستارىنان قونىس اۋدارادى.
شەتەلدىك ازاماتتارعا توقتالساق، استاناعا تۇراقتى تۇرۋ ءۇشىن وزبەكستان مەن قىتاي ازاماتتارى ءجيى كەلەدى. ەكىنشى ورىندا قىرعىزستان جانە موڭعوليا، سودان كەيىن تۇركيا، رەسەي جانە ازەربايجان ەلدەرى. ال تۇركىمەنستان، ۋكراينا جانە تاجىكستاننان كەلەتىندەر سانى از. استاناعا كەلگەندەردىڭ باسىم بولىگى جۇمىسقا ورنالاسۋدى نەمەسە جەكە ءىسىن اشۋدى كوزدەيدى.
