قىزىلوردا وبلىسىندا 17 جاستاعى ءجاسوسپىرىم كولىكتى باسقارا الماي جول اپاتىنا ءتۇسىپ، 1 جولاۋشى كوز جۇمدى
وقيعا 4-مامىردا ساعات 02.45 شاماسىندا بولعان. قىزىلوردا وبلىسىنىڭ شيەلى كەنتىندە تۇراتىن 17 جاستاعى ءجاسوسپىرىم «تويوتا» ماركالى اۆتوكولىگىنىڭ باسقارۋ جۇيەسىنە يە بولا الماي جول- كولىك وقيعاسىن جاساعان.
«جول اپاتى سالدارىنان 1 جولاۋشى ءقوز جۇمىپ، قالعان ۇشەۋى (جۇرگىزۋشىمەن قوسا) جاراقات الدى. بۇل دەرەك بويىنشا ق ر قىلمىستىق كودەكسىنىڭ 345-بابىنىڭ 3-بولىگىمەن سوتقا دەيىنگى تەرگەپ- تەكسەرۋ ارەكەتتەرى جۇرگىزىلۋدە. وندا اۆتوموبيلدى باسقاراتىن ادامنىڭ جول ءجۇرىسى قاعيدالارىن بۇزىپ، ونىڭ سوڭى ابايسىزدا ادام ولىمىنە اكەپ سوققانى كورسەتىلگەن. ءتيىستى سوت ساراپتامالارى تاعايىندالدى»، - دەپ ءمالىم ەتتى قىزىلوردا وبلىستىق پوليتسيا دەپارتامەنتىنەن.
بۇل جونىندە شيەلى اۋداندىق ءبىلىم ءبولىمىنىڭ باسشىسى جىبەك بايمۇراتوۆا تۇسىنىكتەمە بەردى.
«كامەلەتكە تولماعان بالالار كولىكتى رۇقساتسىز ۇيدەن ءتۇن مەزگىلىندە ايداپ شىعىپ، جول اپاتىنا ۇشىراعان. جاراقات العان بالالار ەم الۋدا. جاعدايلارى ءبىرقالىپتى»، - دەدى ءبولىم باسشىسى.
ەسكە سالساق، بۇدان بۇرىن ادام ءولتىردى دەگەن كۇدىكپەن حالىقارالىق ىزدەۋدە بولعان قىزىلوردالىق ۇستالدى.
