قازاقستاننىڭ كومىرسۋتەكتەرىن وندىرۋگە قىتاي ينۆەستيتسيالارى 17.1 ميلليارد دوللارعا جەتتى

استانا. قازاقپارات - الەمدىك ەكونوميكا ءوسىمىنىڭ قارقىنى تومەن بولۋىنا، سونداي-اق قارجى نارىقتارىنىڭ باعاسى وزگەرمەلى جانە بەلگىسىز بولۋىنا قاراماستان ازيا ەلدەرىنىڭ، اسىرەسە قىتايدىڭ ەۋرازيالىق ەكونوميكالىق وداق مەملەكەتتەرىنە ينۆەستيتسيالىق ەكسپانسياسى توقتاپ قالعان جوق.

ەۋرازيالىق دامۋ بانكىنىڭ ىقپالداستىقتى زەرتتەۋ ورتالىعىنىڭ «ە ا ە و جانە ەۋرازيالىق قۇرلىق ەلدەرى: مونيتورينگ جانە تىكەلەي ينۆەستيتسيالارعا تالداۋ» اتتى بايانداماسىندا وسىنداي قورىتىندى جاسالعان، دەپ حابارلادى ت ا س س بانكتىڭ باسپا ءسوز ورتالىعىنا سىلتەمە جاساپ.

باياندامادا ە ا ە و ەلدەرىنە تىكەلەي ينۆەستيتسيالاردىڭ نەعۇرلىم كۇشتى سەرپىنىن قىتايلىق ينۆەستورلار كورسەتۋدە ەكەنى اتاپ وتىلگەن، 2008-جىلدان 2014-جىلعا دەيىن جيناقتالعان تىكەلەي شەتەلدىك ينۆەستيتسيالار ايماقتا ەكى ەسەدەن استام - 11 ميلليارد دوللاردان 27,1 ميلليارد دوللارعا دەيىن ءوستى. جاپوندىق جيناقتالعان تىكەلەي ينۆەستيتسيالار 14,4 ميلليارد دوللارعا - وڭتۇستىك كورەيالىق ينۆەستيتسيالار - 1,9 ميلليارد دوللارعا جەتتى.

مونيتورينگ قىتايلىق تىكەلەي شەتەلدىك ينۆەستيتسيالار قازاقستانعا، جاپوندىق ينۆەستيتسيالار - رەسەيگە شوعىرلانعانىن كورسەتەدى.

2014-جىلدىڭ قورىتىندىسى بويىنشا قازاقستاننىڭ كومىرسۋتەكتەرىن وندىرۋگە قىتاي ينۆەستيتسيالارى 17,1 ميلليارد دوللارعا جەتتى، ال قازاقستاندىق تاسىمال كەشەنى قىتايدان 6,2 ميلليارد تىكەلەي ينۆەستيتسيالار تارتتى. قىتايدىڭ ترانسۇلتتىق كومپانيالارىنىڭ رەسەيدىڭ وتىن كەشەنىنە كاپيتال سالىمدارى 1,2 ميلليارد دوللاردى قۇرادى.

جاپوندىق كومپانيالاردىڭ بارلىق تىكەلەي ينۆەستيتسيالارى رەسەيدە مۇناي جانە تابيعي گاز وندىرۋگە باعىتتالعان. «ساحالين-1» جانە «ساحالين-2» جوبالارى جاپونيادان 10,1 ميلليارد دوللار تارتتى.

يراننىڭ ە ا ە و ەلدەرىنە كاپيتال سالىمدارىن ورىستەتۋى ونشا جوعارى ەمەس، ءبىراق تا ورنىقتى قارقىنمەن جالعاسۋدا. يراندىق تىكەلەي ينۆەستيتسيالاردى نەگىزگى الۋشى - بەلارۋس، 2014-جىلدىڭ سوڭىندا ولاردىڭ كولەمى 731 ميلليون دوللاردى قۇرادى. سالالىق قۇرىلىمدا يراندىق تىكەلەي ينۆەستيتسيالار ە ا ە و ەلدەرىنە كوبىنە قۇرىلىس كەشەنىنە باعىتتالۋدا. ودان كەيىنگى ورىنداردا ينفراقۇرىلىمدىق جەلىلەر مەن كولىك كەشەنى تۇر.

شىعىس ازيالىق ەلدەر مەن يراننىڭ كاپيتال سالىمدارىنا قاراعاندا، تۇرىك ينۆەستيتسيالارى ە ا ە و ەلدەرىنە سالالار بويىنشا تەڭ دارەجەدە بولىنگەن، سەكتورلاردىڭ كوپشىلىگىندە سونداي-اق گەوگرافيالىق ءارتاراپتاندىرۋ بايقالادى. تۇركيانىڭ ە ا ە و- گە 2015-جىلدىڭ باسىنداعى ينۆەستيتسيالارى 7,9 ميلليارد دوللاردى قۇرادى.

ءۇندىستاندىق ينۆەستيتسيالار رەسەي ($3,6 ميلليارد) مەن قازاقستان ($2,3 ميلليارد) اراسىندا عانا بولىنگەن.

ەۋرازيالىق دامۋ بانكى رەسەي مەن قازاقستان 2006-جىلى قاڭتاردا قۇرعان حالىقارالىق قارجى ينستيتۋتى. بانكتىڭ قاتىسۋشى- مەملەكەتتەرى ارمەنيا، بەلورۋسسيا، قازاقستان، قىرعىزستان، رەسەي جانە تاجىكستان.