قاراعاندىدا 16 قاباتتى ۇيدە ورتتەن كوز جۇمعان وتستاۆكاداعى پولكوۆنيك پەن ونىڭ وتباسى بولىپ شىقتى

None
قاراعاندى. قازاقپارات - قاراعاندىداعى كوپقاباتتى ۇيدە ءورت شىققان پاتەردىڭ قوجايىنى زەينەتكە شىققان پوليتسيا پولكوۆنيگى جانە ونىڭ وتباسى مۇشەلەرى ەكەنى بەلگىلى بولدى، دەپ حابارلايدى قازاقپارات ءتىلشىسى.

كەشە قاراعاندىداعى وت شارپىعان پاتەردىڭ يەسى - زەينەتتەگى پوليتسيا پولكوۆنيگى. قازا تاپقان تاعى ەكى ادام - ونىڭ جۇبايى مەن اعاسى بولعان.

70 جاستاعى پولكوۆنيك رينات شوقايەۆ بۇعان دەيىن ق ر ءى ءى م ب. بەيسەنوۆ اتىنداعى قاراعاندى اكادەمياسىنىڭ ساپتىق ءبولىم بويىنشا باستىعىنىڭ ورىنباسارى بولىپ جۇمىس ىستەگەن.

ول اكادەميا كۋرسىنىڭ باستىعى بولعان. مارقۇمنىڭ دوستارى مەن تانىستارىنىڭ ايتۋىنشا، رينات كەنجەباي ۇلى وسى ۋنيۆەرسيتەتتىڭ دامۋىنا زور ۇلەس قوسقان.

كوپتەگەن وفيتسەرلەردى تاربيەلەگەن. ول 70 جاستا ەدى.

پاتەردە سونىمەن قاتار ولاردىڭ 43 جاستاعى ۇلى بولعان.

ونىڭ 8-قاباتتىڭ تەرەزەسىنەن قالاي قۇلاپ كەتكەنى ءالى بەلگىسىز. قازىر ول اۋرۋحانادا جاتىر.

«ناۋقاستىڭ جاعدايى ورتاشا اۋىر. ەسىن بىلەدى. جانساقتاۋ بولىمىندە. دارىگەرلەر بارلىق قاجەتتى مەديتسينالىق كومەك كورسەتىپ جاتىر. ناۋقاس كەۋدە قۋىسىنان جابىق جاراقات العان، جىلىنشىك سۇيەكتەرى سىنعان»، - دەپ حابارلادى قاراعاندى وبلىسى دەنساۋلىق ساقتاۋ باسقارماسىنىڭ باسپا ءسوز قىزمەتى.

ەسكە سالا كەتەيىك، 10- قاڭتار كۇنى ساعات 21:29 دا قاراعاندى قالاسىندا رەسپۋبليكا داڭعىلى، 18/2 مەكەنجايىندا ءورت شىققانى تۋرالى حابار ءتۇستى.

16 قاباتتى، ءبىر كىرەبەرىستى، 127 پاتەرلى تۇرعىن ءۇيدىڭ 8-قاباتىنداعى پاتەردە جالپى الاڭى 30 شارشى مەتر اۋماقتا ءورت شىققان.

1979-جىلى تۋعان ەر ادام جانىپ جاتقان پاتەردىڭ بالكونىنان قۇلاپ، مەديتسينالىق مەكەمەگە جاتقىزىلدى.

تەكسەرۋ بارىسىندا ءۇش ادامنىڭ دەنەسى تابىلدى (بولجام بويىنشا ەكى ەر ادام مەن ايەل).

سونداي-اق، قاراعاندى وبلىسىنىڭ ت ج د باسشىلىعى گاز جارىلىسى راستالماعانىن حابارلادى. وقيعا ورنىنان گاز قۇرىلعىلارى تابىلماعان.

كوپقاباتتى ۇيدەگى ءورت بويىنشا قىلمىستىق كودەكستىڭ 204-بابى 2-تارماعىمەن قىلمىستىق ءىس قوزعالدى.

سوڭعى جاڭالىقتار