زەرەندىدەگى تاۋ شاڭعىسى بازاسىندا 16 جاسار جاس ءوسپىرىم قايتىس بولدى

اقمولا وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، بيىلعى جىلعى قاڭتاردىڭ 2-سىندە ساعات 17:25-تە زەرەندى اۋداندىق پب كەزەكشى بولىمىنە شاڭعى بازاسىنىڭ مەنەدجەرى حابارلاسىپ، سادوۆوە اۋىلىنان 10 ك م قاشىقتىقتا شاڭعى جولىندا استانا قالاسىنىڭ 2006 -جىلعى تۇرعىنى قايتىس بولعاندىعىن ايتقان.

«انىقتالعانداي، جاس ءوسپىرىم اتا-اناسىمەن بىرگە شاڭعى بازاسىنا دەمالۋعا كەلگەن. شاڭعى جولىمەن تومەن سىرعاناپ بارا جاتقان جاس ءوسپىرىم اعاشقا سوعىلىپ، سول جەردە كوز جۇمعان. وسىعان بايلانىستى قىلمىستىق كودەكستىڭ 306-بابى بويىنشا («قاۋىپسىزدىك تالاپتارىنا ساي كەلمەيتىن جۇمىستاردى ورىنداۋ نەمەسە قىزمەتتەر كورسەتۋ») سوتقا دەيىنگى تەرگەۋ باستالدى. ساراپتاما تاعايىندالدى»، - دەدى ۆەدومستۆودان.