ەت جانە ەت ونىمدەرى 16 پايىزعا قىمباتتادى

Ranking.kz پورتالىنىڭ دەرەگىنە قاراعاندا، ءوندىرىستىڭ باسىم بولىگى الماتى وبلىسىنا تيەسىلى - 347,3 مىڭ توننا. ءبىر جىلدا ءوندىرىس كولەمى 3 پايىزعا ارتقان. ۇزدىك ۇشتىككە اقمولا (223,8 مىڭ توننا، 0,5 پايىز ازايعان) جانە سولتۇستىك قازاقستان (161,1 مىڭ توننا، 18,4 پايىزعا كوبەيگەن) وبلىستارى دا كىردى.

1- قازانعا دەيىن رەسپۋبليكادا 9 ميلليون باس ءىرى قارا مال بولدى. بۇل ءبىر جىل بۇرىنعىدان 4,7 پايىزعا كوپ. باسقا تۇلىك تۇرلەرىنىڭ دە سانى ارتىپ كەلەدى. جىلقى 3,8 ميلليونعا، تۇيە 265,3 مىڭعا، قوي 21 ميلليونعا، قۇس 50 ميلليونعا جەتتى.

قازان ايىنىڭ قورىتىندىسىندا ەت جانە ەت ونىمدەرىنىڭ باعاسى ءبىر جىلدا بىردەن 15,9 پايىزعا ارتتى. ونىڭ ىشىندە ەت جانە قۇس ەتى — 14,6، شۇجىق ونىمدەرى — 21,3 پايىز، باسقا دا ەت ونىمدەرى 15,7 پايىزعا قىمباتتادى.

ءبىر جىلدا سيىر ەتىنىڭ باعاسى — 9,3، جىلقى ەتى — 16,3، شوشقا ەتى — 13,4، قوي ەتى — 12,5، قۇس ەتى 28,6 پايىزعا، شۇجىق ونىمدەرىنىڭ ىشىندە پىسىرىلگەن شۇجىقتار - 22,2، جارتىلاي ىستالعان شۇجىقتار 21,2 پايىزعا كوتەرىلدى.

وڭىرلەردىڭ ىشىندە ماڭعىستاۋ وبلىسىندا ەت جانە ەت ونىمدەرى جىل ىشىندە بىردەن 22,6 پايىزعا قىمباتتاعان. ودان كەيىنگى ورىندا پاۆلودار (20 پايىز) جانە اقتوبە (19,5 پايىز) وبلىستارى تۇر.

قازان ايىندا دۇكەندەر مەن بازار سورەلەرىندە سيىر ەتىنىڭ كەلىسى ورتا ەسەپپەن - 2,4 مىڭ، قوي ەتى — 2,7 مىڭ، شوشقا ەتى — 2 مىڭ، جىلقى ەتى — 3 مىڭ، تاۋىق ەتى — 1,4 مىڭ، تاۋىق سان ەتى — 1,2 مىڭ، قايناتىلعان شۇجىق — 2,6 مىڭ، جارتىلاي ىستالعان شۇجىق — 3,1 مىڭ تەڭگەدەن ساتىلدى.