پوليتسەيلەر 16 مارتە مال ۇرلاعان كۇدىكتىلەردى ۇستادى
«سارىاعاش اۋداندىق پوليتسيا بولىمىنە جەرگىلىكتى تۇرعىن ارىزدانىپ، جىلقىسىنىڭ جايىلىمنان ۇرلانعانى بويىنشا شاعىم تۇسىرگەن. اتالعان جايت ق ر ق ك-نىڭ 188-1-بابى «مال ۇرلىعى» بويىنشا تىركەۋگە الىندى. حابارلاما الىسىمەن سارىاعاشتىق ءتارتىپ ساقشىلارىنان جەدەل- تەرگەۋ توبى قۇرىلدى. شۇعىل جانە جوسپارلانعان ارەكەتتەر ناتيجەسىندە كۇدىكتى رەتىندە وزبەكستان ەلىنىڭ ازاماتىن ۇستادى»، - دەلىنگەن حابارلامادا.
تەكسەرۋ كەزىندە كۇدىكتى جاس جىگىت وزىمەن بىرگە مال ۇرلىعىمەن اينالىسقان، ياعني قىلمىستى ۇيىمداستىرۋشى تاعى 2 كۇدىكتىنىڭ بار ەكەنىن ايتادى. ولار كوپ ۇزاماي قولعا تۇسكەن. «ۇستالعانداردىڭ ەكەۋى وزبەكستان رەسپۋبليكاسىنىڭ ازاماتى بولسا، بىرەۋى جەرگىلىكتى تۇرعىن بولىپ شىقتى. تياناقتى تەكسەرۋ مەن زەردەلەۋ بارىسىندا وسى ۇستالعانداردىڭ 16 جايت مال ۇرلىعىنا قاتىسى بارى انىقتالدى. ال شىعىن كولەمى 10 ميلليون تەڭگەدەن جوعارى ەكەنى بەلگىلى بولدى. انىقتالعانداي، كۇدىكتىلەر قىلمىس جاساۋ بارىسىندا ءوز رولدەرىن الدىن الا قۇرىلعان جوسپار بويىنشا ورىنداعان. مىسالى، باستى كۇدىكتى مال جايىلىمىندا قاراۋسىز جۇرگەن جىلقى، سيىرلاردى بايقاعان بويدا جۇك كولىگىنە تيەپ وتىرعان. سودان سىبايلاسى ەكەۋى ۇرلانعان ءۇي جانۋارلارىن ساتىپ الۋشىلارعا، قاساپشىعا ارزان باعادا وتكىزگەن. ولار ۇرلاعان ولجالارىن «گازەل» ماركالى كولىگىمەن تاسىمالداعان»، - دەپ تولىقتىرادى دەپارتامەنتتەن. پوليتسيا ايعاق زات رەتىندە «گازەل» كولىگى مەن 2 جىلقىنى تاركىلەدى. كۇدىكتىلەر قاماۋعا الىنىپ، سوتقا دەيىنگى تەرگەۋ امالدارى ءجۇرىپ جاتىر.
