نۇر-سۇلتاندا قوعامدىق ءتارتىپ 16 مىڭ كامەرا ارقىلى قاداعالانادى
«جىل باسىنان باستاپ iKOMEK109 قالالىق ورتالىعىنا 661 مىڭنان استام ءوتىنىش كەلىپ تۇسكەن. تۇرعىنداردى نەگىزىنەن دەنساۋلىق ساقتاۋ، قوعامدىق كولىك، اباتتاندىرۋ جانە باسقا دا ماسەلەلەر الاڭداتادى»، - دەپ حابارلادى ورتالىقتىڭ باسپا ءسوز قىزمەتى.
iKOMEK109 سيتۋاتسيالىق ورتالىعى 16 مىڭنان استام ينتەگراتسيالانعان بەينەباقىلاۋ كامەراسى ارقىلى قالا تۇرعىندارىنىڭ قاۋىپسىزدىگى مەن جايلى تۇرمىسىنا تاۋلىك بويى مونيتورينگ جۇرگىزىپ وتىر.
«بەينەباقىلاۋ جۇيەسى ارقىلى ينسپەكتورلار قالا كوشەلەرىنىڭ قاردان تازارتىلماۋى، سۋ باسۋ، قوقىستىڭ دەر كەزىندە جينالماۋى سياقتى فاكتىلەردى تىركەپ، پوليتسيا دەپارتامەنتىنىڭ قىزمەتكەرلەرىمەن بىرگە قۇقىقتىق ءتارتىپتى قاداعالايدى. قالالىق مونيتورينگ جانە جەدەل ارەكەت ەتۋ ورتالىعىنىڭ قاردى ۋاقىتىلى شىعارۋىن باقىلاۋ جانە مونيتورينگىلەۋ ارقاسىندا كوممۋنالدىق قىزمەتتەر قالا اۋماعى مەن تۇرعىن الاپتاردان قاردى ۋاقىتىلى جيناپ، شىعارىپ وتىر»، - دەيدى iKOMEK109 ورتالىعىنىڭ باسشىسى جاننات ءدۇبىروۆا.
بەينەباقىلاۋ كامەرالارى ارقىلى جولدار مەن اۋلالاردا سۋ باسقان ۋچاسكەلەر انىقتالعان جاعدايدا، سۋ باسقان جەرگە جەدەل تارتىپپەن سۋ ايدايتىن تەحنيكا جىبەرىلەدى.
وسى سياقتى كەلەڭسىزدىككە كۋا بولعان استانالىقتار iKOMEK109 ءبىرىڭعاي بايلانىس ورتالىعىنىڭ 109 نومىرىنە قوڭىراۋ شالىپ، مالىمەت بەرۋىنە بولادى.
ەسكە سالايىق، وسكەمەندە جوعالعان 10 جاسار بالا بەينەباقىلاۋ كامەرالارى ارقىلى تابىلعان بولاتىن.
