ەۋروپادا «يۋنيس» داۋىلى سالدارىنان 16 ادام قازا تاپتى

نۇر- سۇلتان. قازاقپارات - وسى اپتادا «يۋنيس» داۋىلى ەۋروپانىڭ ءتۇرلى ەلدەرىندە 16 ادامنىڭ ءومىرىن قيىپ كەتتى، دەپ حابارلايدى قازاقپارات.

نيدەرلاندى ەلىندە ءتورت ادام، پولشادا - ءتورت ادام، ۇلى بريتانيادا - ءۇش ادام، گەرمانيا مەن بەلگيادا ەكى ادامنان، يرلانديادا ءبىر ادام قازا تاپتى. ەۋروپالىق ب ا ق اتاپ وتۋىنشە، جازاتايىم وقيعالاردىڭ كوبىنە اعاشتاردىڭ قۇلاۋى نەمەسە قۇرىلىس كونسترۋكتسيالارىنىڭ جۇلىنۋى سەبەپ بولدى.

«يۋنيس» داۋىلى ەۋروپادا 18-اقپاندا باستالعان. سينوپتيكتەردىڭ مالىمەتىنشە، داۋىل كەزىندەگى جەل ەكپىنى سەكۋندىنا 55 مەترگە جەتكەن. داۋىل يرلانديادان ۇلى بريتانياعا قوزعالىپ، فرانسيا سولتۇستىگىمەن جانە بەنيليۋك ەلدەرى ارقىلى دانيا مەن گەرمانياعا وتكەن. ەكپىندى جەلدەن ۇيلەردىڭ شاتىرلارى جۇلىنىپ، اعاشتار سىندى، ەلەكتر جەلىلەرى بۇلىنگەن.