دارىگەر ۆاكسينانىڭ نە سەبەپتى جۇكتىلىكتىڭ 16-اپتاسىنان كەيىن سالىناتىنىن ءتۇسىندىردى
وسكەمەن. قازاقپارات - شىعىس قازاقستان وبلىسى التاي اۋداندىق ەمحاناسىنىڭ اكۋشەرلىك جانە گينەكولوگيا ءبولىمىنىڭ مەڭگەرۋشىسى ا. كارمەنوۆا Pfizer ۆاكسيناسىنىڭ نە سەبەپتى جۇكتىلىكتىڭ 16-اپتاسىنان كەيىن سالىناتىنىن ءتۇسىندىرىپ بەردى، دەپ حابارلايدى قازاقپارات ءتىلشىسى.
«قازىر ەلىمىزدە جۇكتى جانە جاڭا بوسانعان ايەلدەر اراسىندا كوروناۆيرۋس جۇقتىرعاندار ازايماي تۇر. وسى ساناتتاعىلار تاۋەكەل توبىنا جاتادى. جۇكتى ايەلدىڭ جاتىرىنداعى ۇرىق قورەكتىك زاتتاردى وزىنە الادى. ولار - اقۋىزدار، كومىرسۋلار، مايلار، ۆيتاميندەر، ميكروەلەمەنتتەر. بۇل قورەكتىك زاتتار ايەل ورگانيزمىندەگى يممۋندى جۇيەگە تىكەلەي جاۋاپ بەرەدى»، - دەدى ا. كارمەنوۆا.
ونىڭ ايتۋىنشا، التاي اۋدانىندا امەريكالىق Pfizer ەكپەسىنىڭ دوزالارى جەتكىلىكتى.
«بۇل ەكپەدە كوروناۆيرۋستىڭ موديفيكاتسيالانعان ريبونۋكلەين قىشقىلى بار. ول ايەل مەن نارەستەنىڭ ورگانيزمىنە ەشقانداي زيان كەلتىرمەيدى. ۇرىقتىڭ ورگاندارى مەن جۇيەسىنىڭ قالىپتاسۋى جۇكتىلىكتىڭ 12-اپتاسىندا اياقتالادى. ال نارەستە پلاتسەنتاسىنىڭ قالىپتاسۋى 16 اپتاعا دەيىن سوزىلادى. ەكپەنى جۇكتىلىكتىڭ 16-اپتاسىنان كەيىن، ال جاڭا بوسانعاندارعا 42 كۇننەن كەيىن الۋعا بولادى»، - دەدى اۋداندىق ەمحانانىڭ اكۋشەرلىك جانە گينەكولوگيا ءبولىمىنىڭ مەڭگەرۋشىسى.
اۆتور: تالعاتجان مۇحامەتبەك ۇلى
