ەلوردادا ءيىسشىل يت جوعالىپ كەتكەن 16 جاستاعى قىزدى تاۋىپ بەردى
قىزدى ىزدەۋگە پوليتسيانىڭ جەكە قۇرامى، سونداي-اق «فەليكس» ەسىمدى ارنايى ۇيرەتىلگەن قىزمەتتىك ءيتى بار كينولوگيالىق قىزمەت قىزمەتكەرى جۇمىلدىرىلعان.
يت ساناۋلى مينۋتتاردا قىزدىڭ ءىزىن تاۋىپ، بىرنەشە ءۇيدى ارالاپ، بويجەتكەن مەن جىگىت بىرگە تۇرعان كولىككە الىپ كەلدى. تابىلعان قىز اناسىنا تاپسىرىلدى. يۋۆەنالدى پوليتسيا قىزمەتكەرلەرى كامەلەتكە تولماعان بالانى پروفيلاكتيكالىق ەسەپكە الدى. اتا- انالارمەن اڭگىمە جۇرگىزىلدى.
انىقتالعانداي، ول بۇرىن دا ۇيدەن كەتىپ، ءبىراق ۇزاق ۋاقىتتان كەيىن ورالعان. قىزمەتتىك ءيتتىڭ ارقاسىندا جاس ءوسپىرىم از ۋاقىتتىڭ ىشىندە تابىلدى.
ايتا كەتۋ كەرەك، «فەليكس» اتتى يت جاقىندا قىزمەتكە كىرگەن. وسى جىلدىڭ قىركۇيەك ايىنىڭ باسىندا پوليتسيا ءيتى بالالار اتتراكسيوندارىنىڭ جانىندا جوعالىپ كەتكەن ەكى جاسار بالانى تاۋىپ العان بولاتىن.
اۆتور: اياۋلىم التىنبەك
