جاقىنىڭا جاناشىر بول: ب ق و-دا كوروناۆيرۋس جۇقتىرعان 16 ادام اۋىر حالدە جاتىر
وبلىستىق دەنساۋلىق ساقتاۋ باسقارماسىنىڭ باسشىسى بولاتبەك قايۋپوۆتىڭ بريفينگتە ءمالىم ەتكەنىندەي، وڭىردە بارلىعى 967 ناۋقاس تىركەلسە، سونىڭ 240 ى جۇقپالى اۋرۋلار اۋرۋحاناسىندا ەمدەلۋدە. سونىڭ التاۋى - بالالار. 64 ى - اۋرۋ بەلگىسى بايقالمايتىندار، 58 ى - جەڭىل، 102 سى ورتاشا حالدە. 16 ادام اۋىر حالدە بولسا، سونىڭ تورتەۋى جاساندى تىنىس الۋ اپپاراتىنا قوسىلعان. ولاردىڭ بىرەۋى 38، ەكىنشىسى 73، قالعان ەكەۋى 60 جاستا.
جەتى ناۋقاس جانساقتاۋ بولىمىندە جاتسا، تاعى جەتەۋى ينتەنسيۆتى تەراپيا پالاتاسىندا. سوڭعى كەزدە اۋىر حالدەگى ناۋقاستار كوبەيىپ بارادى. اسىرەسە، پنيەۆمونيامەن سىرقاتتانعاندار سانى 53-كە جەتتى. ولار وتتەگى ماسكاسىنا تاۋەلدى. وتتەگى ماسكاسىن كيگەن بۇل ناۋقاستار دا بارىنشا نازار اۋدارۋدى، ءتيىستى ەمدى قاجەت ەتەدى. وتكەن دەمالىس كۇندەرى 47 ناۋقاس تىركەلدى.
«كەيىنگى كەزدە ادامدار كوشەلەرگە كوپ شىعا باستادى. ماسكا تاقپايتىندار، الەۋمەتتىك اراقاشىقتىقتى ساقتامايتىندار از ەمەس. سونىڭ سالدارىنان ءبىر ادام اۋىرسا، ونىمەن قارىم- قاتىناستا بولعاندار اراسىندا ۆيرۋس تا تەز تارايدى. اسىرەسە، كوروناۆيرۋس جاسى ۇلعايعان جاندار، بۇرىننان اۋرۋلارى بار ادامدار ءۇشىن قاۋىپتى. سوندىقتان ءوز جاقىندارىڭىزعا دەرت جۇقتىرماۋ ءۇشىن تۇرعىنداردى شەكتەۋ شارالارىن بارىنشا قاتاڭ ساقتاۋعا تاعى دا شاقىرامىز»، دەدى ب. قايۋپوۆ.
ب ق و تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى مۇحامعالي ارىسپايەۆتىڭ ءمالىم ەتكەنىندەي، كوروناۆيرۋستىڭ وتكەن اپتاداعى ورتاشا ءوسىمى 2،4 پايىزدى قۇرادى.
وڭىردە ەپيدەميولوگيالىق احۋال تۇراقسىز. اۋىرعانداردىڭ 56 پايىزى - بۇرىن ىندەت جۇقتىرعاندارمەن قارىم-قاتىناستا بولعاندار. سىرقاتتاردىڭ باسىم كوپشىلىگى (821 ى) ورال قالاسىندا تىركەلسە، اقجايىق اۋدانىندا - 5، بوكەي ورداسىندا - 3، بورلىدە - 16، جاڭاقالادا - 5، جانىبەكتە - 12، بايتەرەكتە - 39، قاراتوبەدە - 2، سىرىمدا - 12، تاسقالادا - 30، تەرەكتىدە - 20، شىڭعىرلاۋدا 2 ادام اۋىردى.
دەرت جالعىز تەك قازتالوۆ اۋدانىندا عانا تىركەلگەن جوق. سىرىم، قاراتوبە، جاڭاقالا اۋداندارىندا شەكتەۋ شارالارى ەنگىزىلسە، سونداي- اق ورال قالاسىندا دا كەيبىر نىساندار كارانتينگە جابىلدى. م. ارىسپايەۆ 15-ماۋسىمنان باستاپ ەنگىزىلگەن شەكتەۋ شارالارىن ساقتاۋ قاجەتتىگىن اتاپ ءوتتى. ەسكە سالا كەتەيىك، بۇدان بۇرىن ب ق و-دا 15-ماۋسىمنان باستاپ قانداي شەكتەۋ شارالارى ەنگىزىلەتىنىن، كوروناۆيرۋستان قايتقان قاريانىڭ اۋرۋحاناعا وتە اۋىر جاعدايدا تۇسكەنىن جازعان بولاتىنبىز.
