قازاقستاندا حالىقارالىق دەڭگەيدەگى كوپبەيىندى 16 اۋرۋحانا سالىنادى

بۇل جايىندا ق ر دەنساۋلىق ساقتاۋ مينيسترلىگىنەن ءمالىم ەتتى، دەپ حابارلايدى قازاقپارات ءتىلشىسى.

ۆەدومستۆو مالىمەتىنشە، ەلىمىزدەگى ەسكىرگەن 40 نىساننىڭ ورنىنا حالىقارالىق دەڭگەيدەگى كوپبەيىندى 16 اۋرۋحانا (وبلىستىق كوپبەيىندى اۋرۋحانا، قالالىق كوپبەيىندى اۋرۋحانا، ۋنيۆەرسيتەتتىك كلينيكا) سالىنادى. اۋرۋحانالار زاماناۋي تەحنيكالىق شەشىمدەردى ەسكەرە وتىرىپ جوسپارلانادى. ۇزاقمەرزىمدى كەلىسىمشارتتار اياسىندا مەديتسينالىق تەحنيكامەن، اقپاراتتىق جۇيەمەن تولىقتاي جابدىقتالىپ، تەحنيكالىق قىزمەت كورسەتۋمەن قامتاماسىز ەتىلەدى.

ءاربىر ستاتسيوناردا پاتسيەنتتەردى دەر ۋاقىتىندا ءارى ساپالى دياگنوستيكالاۋعا جانە ەمدەۋگە مۇمكىندىك بەرەتىن زاماناۋي ينفەكتسيالىق كورپۋستار سالۋ، كلينيكا قىزمەتكەرلەرىنىڭ قاۋىپسىزدىگىن قامتاماسىز ەتۋ، مەديتسينالىق ۇيىمداردىڭ ينفەكتسيالىق ەمەس جەلىسىنە جۇكتەمەنى تومەندەتۋ جوسپارلانعان.

اۋرۋحانالاردى مەملەكەتتىك- جەكەشەلىك سەرىكتەستىك كەلىسىمشارتى جانە وزگە دە ۇزاقمەرزىمدى كەلىسىمشارتتار اياسىندا قۇرۋ كوزدەلگەن. بۇل بيۋدجەتكە ءبىر مەزەتتە تۇزەتىن اۋىرتپالىقتان ارىلۋعا مۇمكىندىك بەرىپ، شەتەل كاپيتالىن تارتۋعا، اۋرۋحانا قۇرىلىسىنا جاڭا تەحنولوگيالاردى ەنگىزۋگە جانە دەنساۋلىق ساقتاۋ نىساندارىنىڭ پايدالانۋ ساپاسىن ارتتىرۋعا جول اشادى. بۇل 5-6 جىلدىڭ ىشىندە Joint Commission International (JCI) حالىقارالىق ستاندارتىنا سايكەلەتىن 8 مىڭنان استام توسەك- ورىنعا شاقتالعان الدىڭعى قاتارلى جوعارى تەحنولوگيالىق اۋرۋحانا جەلىسىن قۇرۋعا مۇمىندىك بەرەدى.

اتالعان جوباعا وتاندىق، سونىمەن قاتار حالىقارالىق دەڭگەيدەگى اۋرۋحانالار قۇرىلىسىندا تاجىريبەسى بار شەتەلدىك كومپانيالار مەردىگەر بولادى. اۋرۋحانا قۇرىلىسىنا قاتىستى جوبالاردى دەر ۋاقىتىندا جۇزەگە اسىرۋ ءۇشىن جوبالىق كومپانيا - دەنساۋلىق ساقتاۋ سالاسىنداعى وپەراتور قۇرىلادى. كومپانيانىڭ نەگىزگى مىندەتتەرى: ازىرلەۋ كەزەڭىندە - بۇل اتالعان جوبالاردىڭ بارلىعىن اكىمشىلەۋ جانە ۇيلەستىرۋ، م ج س كەلىسىمشارتتارىن جاساۋ شارالارىن جۇزەگە اسىرۋ؛ م ج س كەلىسىمشارتتارى بويىنشا جەكە سەرىكتەستىڭ مىندەتتەرىن ورىنداۋىن باقىلاۋ.

اۆتور: مارلان جيەمباي