قىتايدان كەلگەن 16 قازاقستاندىق اۋرۋحانادان شىقتى - ەلجان ءبىرتانوۆ
بۇل تۋرالى ق ر دەنساۋلىق ساقتاۋ ءمينيسترى ەلجان ءبىرتانوۆ ايتىپ بەردى. مينيستر 6 - قاڭتاردان باستاپ، ەلىمىزدە ەرەكشە سانيتارلىق شارالار ەنگىزىلىپ جاتقانىن اتاپ ءوتتى.
«بىرىنشىدەن، پرەزيدەنت تاپىسىرماسىمەن مەملەكەتتىك دەڭگەيدە ارنايى كوميسسيا قۇرىلدى، ەرەكشە شارالار جوسپارى بەكىتىلدى. حالىقتى ينفەكسيادان قورعاۋ ماسەلەسى بويىنشا ق ح ر مەن قازاقستان اراسىنداعى شەكارانىڭ سانيتارلىق قورعاۋى كۇشەيتىلدى. بارلىق كەلىپ جاتقان ازاماتتار كۇشەيتىلگەن سانيتارلىق تەكسەرۋدەن وتۋدە. قازىرگى ۋاقىتتا مەملەكەتتىك شەكارادان 20515 ازامات ءوتتى. ولاردىڭ اراسىندا 19989 ق ر ازاماتتارى، 526 شەتەلدىك ازامات»، - دەدى ەلجان ءبىرتانوۆ ورتالىق كوممۋنيكاتسيالار قىزمەتىندەگى بريفينگتە.
سونىمەن بىرگە، بۇل ازاماتتار تۇرعىلىقتى مەكەنجايى بويىنشا باقىلاۋعا الىنادى. قازىرگى ۋاقىتتا ولاردىڭ 78 پايىزى نەمەسە 15738 اداممەن بايلانىس ورناتىلدى.
«جەرگىلىكتى ەمحانالار ولاردىڭ دەنساۋلىعىن باقىلاۋعا الادى. ولاردىڭ اراسىندا جەرگىلىكتى جانە شەتەلدىك 54 ادام جوعارى تەمپەراتۋرا شاعىمىمەن اۋرۋحاناعا جەتكىزىلدى. ولاردىڭ دياگنوزدارى ۆيرۋستىق ينفەكتسياعا بايلانىستى. 16 ناۋقاسقا دياگنوز قويىلىپ، ەمدەلىپ، اۋرۋحانادان شىعارىلدى. ەندى جۇقپالى اۋرۋلار اۋرۋحاناسىندا 38 ناۋقاس ەمدەلىپ جاتىر» ، - دەدى ە. ءبىرتانوۆ.
بارلىق ناۋقاستان ەرەكشە زەرتحانالىق اناليز الىندى.
«الماتىداعى ايتىمبايەۆ اتىنداعى اسا قاۋىپتى ينفەكتسيالار ۇلتتىق عىلىمي ورتالىعى نەگىزىندە جانە ۇلتتىق بيوتەحنولوگيالىق ورتالىق ماماندارىمەن بىرگە ارنايى گەنەتيكالىق دياگنوستيكا باستالدى. وسى زەرتتەۋ ناتيجەسى بويىنشا ەمدەۋ جۇرگىزەمىز» ، - دەدى مينيستر.
ونىڭ ايتۋىنشا، ازىرگە دۇنيە جۇزىندە كوروناۆيرۋس جۇقتىرعان 7711 ناۋقاس تىركەلدى، 170 ناۋقاس كوز جۇمدى. سونىمەن بىرگە، جالپى 17 مەملەكەتتە 90 ناۋقاس تىركەلدى.
