ءابىش كەكىلباي ۇلىنىڭ شىعارمالارى الەمنىڭ 16 تىلىنە اۋدارىلدى
بۇل تۋرالى بۇگىن «ءابىش الەمى» اتتى وقۋ كونگرەسىندە ق ر مادەنيەت جانە سپورت ءمينيسترى اقتوتى رايىمقۇلوۆا ايتتى، دەپ حابارلايدى قازاقپارات ءتىلشىسى.
سالتاناتتى شارادا مەملەكەتتىك حاتشى قىرىمبەك كوشەربايەۆتىڭ قۇتتىقتاۋ حاتىن وقىپ بەرگەن مادەنيەت جانە سپورت ءمينيسترى جينالعاندارمەن اقجولتاي جاڭالىقتارىمەن ءبولىستى.
«ابىز اعامىزدىڭ شىعارمالارى الەمنىڭ 16 تىلىنە، سونىڭ ىشىندە بيىل «اڭىزدىڭ اقىرى» رومانى ورىس، اعىلشىن، فرانسۋز تىلدەرىنە اۋدارىلدى. ءابىش اعانىڭ شىعارماشىلىعىن ناسيحاتتاۋ ماقساتىندا ەلىمىزدە كوپتەگەن شارالار اتقارىلدى. سونىڭ ىشىندە ءابىش كەكىلبايەۆتىڭ «اڭىزدىڭ اقىرى» رومانى قازاقستان رەسپۋبليكاسىنىڭ ۇلتتىق اكادەميالىق كىتاپحاناسىنىڭ ەڭ ۇزدىك جوبالارىنىڭ ءبىرى «ءبىر ەل - ءبىر كىتاپ» رەسپۋبليكالىق اكسياسى اياسىندا جالپى حالىقتىق وقۋعا يە بولدى. 4 مىڭنان استام وتاندىق كىتاپحانانى قامتىعان بۇل جوبا اياسىندا 700 مىڭنان استام وقىرمان ءابىش اعامىزدىڭ شىعارماسىن وقىدى»، - دەدى اقتوتى رايىمقۇلوۆا.
بۇل رەتتە كىتاپتىڭ وقىرمانعا جەتۋىنە دانەكەر بولاتىن قاسيەتتى ورىن - كىتاپحانانىڭ، كىتاپ پەن اۆتوردى كەزدەستىرەتىن رۋحاني وردانىڭ شىراقشىلارى - كىتاپحاناشىلاردىڭ ەڭبەگىنە ەرەكشە توقتالعان مينيستر الداعى جىلدان سالا قىزمەتكەرلەرىنىڭ جالاقىسى 50 پايىزعا وسەتىنىن ايتتى.
جازۋشىنىڭ ادەبيەتى مەن شىعارماشىلىعىن، قازاق ادەبيەتىنىڭ قۇندىلىقتارىن حالىقارالىق عىلىمي ءبىلىم بەرۋ جۇيەسىندە ناسيحاتتاۋ جانە كوپشىلىككە تاراتۋدى ماقسات تۇتقان كونگرەسس اياسىندا ءابىش كەكىلباي ۇلىنىڭ 20 تومدىق كىتاپتارىنىڭ تۇساۋكەسەرى ءوتتى.
سالتاناتتى شاراعا فيلولوگيا عىلىمدارىنىڭ دوكتورى، پروفەسسور، جازۋشى مىرزاتاي جولداسبەكوۆ، قازاقستان جازۋشىلار وداعىنىڭ باسقارما ءتوراعاسى ۇلىقبەك ەسداۋلەت، جازۋشى، ق ر مەملەكەتتىك سىيلىعىنىڭ لاۋرەاتى تولەن ابدىك، سىنشى، ادەبيەتتانۋشى، مەملەكەت جانە قوعام قايراتكەرى سۇلتان ورازالينوۆ سىندى تانىمال تۇلعالار قاتىستى.
اۆتور: مارلان جيەمباي
