الماتىدا 16 -جەلتوقسان كۇنى كاسىپقوي بوكس كەشى وتەدى
بۇل تۋرالى تانىمال بوكسشى قانات التايەۆ ايتتى، دەپ حابارلايدى قازاقپارات ءتىلشىسى.
قانات التايەۆتىڭ ەسىمى بوكس جانكۇيەرلەرىنە جاقسى تانىس. قازىرگى ۋاقىتتا اسا اۋىر سالماقتاعى كاسىپقوي بوكسشى ۇلى بريتانيانىڭ «MTK Global Kazakhstan» كومپانياسىنىڭ فيليالىندا جاتتىقتىرۋشى بولىپ جۇمىس ىستەيدى.
«MTK Global Kazakhstan» مەنەدجەرلىك كومپانياسى بيىل عانا قۇرىلدى. سوعان قاراماستان ءبىز قىسقا عانا مەرزىمدە ءبىراز شارۋا تىندىردىق. بۇگىنگى كۇنى ءبىزدىڭ كومپانيادا 12 بوكسشى بار. اتاپ ايتساق، جانقوش تۇراروۆ، ۆيكتور كوتوچيگوۆ، الي بالويەۆ، اباي تولەش، ەلشات نىعمەتوللا، ابىلقايىر شەعاليەۆ، راي سەيىتجانوۆ، ەسكەندىر حارسان، نۇرتاس اجبەنوۆ، نۇردوس تولەباي، ميراسالى سارسەنوۆ. تاعى ءبىر جەرلەسىمىز سۇلتان زاۋربەك ۇلى بريتانيادا وقۋ كۋرسىنان ءوتىپ جاتىر، ول «MTK Global» كومپانياسىمەن كەلىسىمشارتقا وتىردى. سپورت جانكۇيەرلەرىنە بۇل كومپانيا تۋرالى ءتۇسىندىرۋدىڭ قاجەتى جوق دەپ سانايمىن، ويتكەنى ونىڭ قۇرامىندا 250 دەن استام بوكسشى بار، ولاردىڭ ىشىندە تايسون فيۋري، دجو ساۋندەرس جانە باسقالارى بار»، - دەيدى جاتتىقتىرۋشى.
قانات التايەۆ كاسىپقوي بوكس كەشىندە جۇدىرىقتاسۋعا شىعاتىن بارلىق بوكسشىلاردىڭ ەرەكشە دايىندالىپ جاتقانىن اتاپ ءوتتى.
«16 -جەلتوقسان - قازاقستاندىقتار ءۇشىن ايتۋلى جانە تاريحي كۇن. بۇل - مەملەكەتتىك مەرەكە تاۋەلسىزدىك كۇنى. وسىنداي ايتۋلى كۇندە قازاقستاننىڭ تۋى استىندا ونەر كورسەتۋ - ءبىز ءۇشىن ۇلكەن مارتەبە. جىگىتتەر ءوز شەبەرلىگىن بارىنشا كورسەتۋگە تىرىسادى. ميلليونداعان وتانداستارىمىزدىڭ ءۇمىتىن اقتاۋعا بارىن سالادى. جاقىن كۇندەرى جىگىتتەر قارسىلاسىنىڭ اتىن بىلەتىن بولادى»، - دەدى قانات التايەۆ.
جارىستىڭ وزىنە كەلسەك، بوكس كەشىندە 12 كەزدەسۋ وتەدى. باستى جەكپە-جەكتە قازاقستاندىق ۆيكتور كوتوچيگوۆ WBC International نۇسقاسىنىڭ جەڭىل سالماقتاعى التىن بەلبەۋىن ساراپقا سالادى. 26 جاستاعى تاراز قالاسى تۋماسىنىڭ كاسىپقوي رينگتە جۇدىرىقتاسىپ جۇرگەنىنە ءتورت جىلعا جۋىقتاپ قالدى. سول ارالىقتا 10 كەزدەسۋ وتكىزگەن كوتوچيگوۆ بارلىعىن جەڭىسپەن اياقتادى. ءتورت قارسىلاسىن ايقىن باسىمدىقپەن ۇتتى. ايقاستى تەك قازاقستاندا عانا ەمەس، قىتاي، گرۋزيا، گەرمانيا، ۇلىبريتانيا جانە رەسەيدە دە وتكىزىپ، كورەرمەننىڭ ىستىق ىقىلاسىنا بولەندى.
ايتا كەتەيىك، 16 -جەلتوقساندا رينگكە قازاقستان، وڭتۇستىك افريكا رەسپۋبليكاسى، نيگەريا، فيليپپين، تايلاند، گرۋزيا، ءازىربايجان، رەسەي فەدەراتسياسى جانە وزبەكستاننان كەلگەن تانىمال بوكسشىلار شىعادى. سونداي-اق، بوكس كەشىنە وزبەكستاننىڭ جارقىن جۇلدىزى فازليددين گايبنازاروۆ ارنايى كەلەدى.
اۆتور: الما مۇقانوۆا
