كورەياداعى اۋرۋحانا 16 جىل بويى قاعاز قولدانباستان جۇمىس ىستەپ تۇر
كۇنىنە بۋندان كلينيكاسىنىڭ دارىگەرلەرى 7 مىڭداي ادامعا قىزمەت كورسەتەدى. اۋرۋحانانىڭ ءاربىر مامانىندا جۇيەگە كىرەتىن جەكە لوگينى مەن قۇپيا ءسوزى بار. ناۋقاستاردا دا سونداي مۇمكىندىكتەر قاراستىرىلعان. ۇيدەن شىقپاي دارىگەرددىڭ قارالۋىنا جازىلۋعا بولادى. سونداي- اق، ۇيالى قوسىمشانىڭ كومەگىمەن قان ساراپتاماسىن، قابىلدايتىن دارىلەر ءتىزىمىن جانە ەكپە كەستەسىن قاراپ وتىرۋعا بولادى. تۇسىنىكسىز ۇعىمداردىڭ ماعىناسى مەن ءتۇرلى اۋرۋلاردىڭ سالدارىن قاراپايىم تىلمەن جەتكىزەتىن ەلەكتروندى مەديتسينالىق ەنتسيكلوپەديا دا بار.
سەرگەي كيم، بۋندان اۋرۋحاناسىنىڭ پروفەسسورى:
- كورەيا عانا ەمەس، ينتەرنەتكە كىرۋگە مۇمكىندىگى بار الەمنىڭ بۇكىل جەرىنەن جۇيەگە كىرىپ، ساراپتامالار ناتيجەلەرى مەن ناۋقاستار تۋرالى بارلىق اقپاراتتى كورە الامىن. ناۋقاستار مەن دارىگەرلەر اراسىنداعى وسىنداي سيفرلىق بايلانىس وپەراتسيالاردان كەيىنگى اسقىنۋدى بارىنشا ازايتقان. بۇل كورسەتكىش اۋرۋحانادا جارتى پروتسەنت عانا قۇرايدى.
دارىگەرلەرگە روبوت- حيرۋرگتار مەن اقىلدى كەرۋەتتەر دە كومەك بەرەدى. وسى كەرۋەتتەردەگى ەكرانداردان ناۋقاستى ەمدەۋ رەتى، بولمەدەگى تەمپەراتۋرا مەن جارىق مولشەرى تۋرالى مالىمەت كورۋگە بولادى.
لي دجي سون، بۋندان اۋرۋحاناسىنىڭ ءبولىم مەڭگەرۋشىسى:
- حيميالىق قوسپالاردى ارالاستىراتىن روبوتتى ساتىپ الدىق. بۇرىن مۇنى ادامدار ىستەيتىن. ال روبوت قاجەتتى مولشەرىن دالىرەك انىقتايدى.
اۋرۋحانادا قىزمەتكەرلەردىڭ بۇلدىرشىندەرى ءۇشىن بالا باقشا دا بار. ونى وسىدان ەكى جىل بۇرىن اشقان. وسىدان كەيىن مەدبيكەلەردىڭ جۇمىستان شىعۋى كورسەتكىشى كۇرت كۇرت ازايعان. بالالارىنا ۋايىمداماي، جۇمىس ىستەۋ ارقىلى ناۋقاستارعا قىزمەت كورسەتۋ ساپاسى ايتارلىقتاي ارتا تۇسكەن.
www.24.kz