ەلىمىزدە 16 جاستاعى قىزدارعا ابورت جاساتۋعا رۇقسات بەرىلە مە
وتكەن اپتادا ق ر دەنساۋلىق ساقتاۋ مينيسترلىگى كامەلەتتىك جاسقا تولماعان قازاقستاندىقتاردىڭ 16 جاستان باستاپ اتا-انا كەلىسىمىنسىز مەديتسينالىق قىزمەت تۇتىنۋعا، ونىڭ ىشىندە ابورت جاساتۋعا رۇقسات بەرۋدى ۇسىنعان ەدى. مينيسترلىكتىڭ پىكىرىنشە، بۇل ەرتە جاستا بالا تۋۋ سانىن ازايتۋعا كومەكتەسەدى.
ق ر د س م قوعامدىق دەنساۋلىق ساقتاۋ ساياساتى دەپارتامەنتىنىڭ ديرەكتورى ايجان يسماعامبەتوۆانىڭ ايتۋىنشا، بۇل تاستاندى بالالاردىڭ ازايۋىنا دا سەپتىگىن تيگىزبەك.
«جوسپارلانباعان جۇكتىلىك بالانى قورعانسىز كۇيدە تاستاپ كەتۋدىڭ بىردەن ءبىر سەبەبى. ءبىز زاڭناماعا ەنگىزگەلى وتىرعان نورما وسى ماسەلەلەردىڭ الدىن الادى»، - دەدى ايجان يسماعامبەتوۆا ۇكىمەت ۇيىندە جۋرناليستەرگە بەرگەن سۇحباتىندا.
ونىڭ ايتۋىنشا، سوڭعى ءۇش جىلدا جاسوسپىرىمدەر اراسىندا جۇكتىلىك پەن ابورت ستاتيستيكاسى تومەندەپ كەلەدى. دەگەنمەن، بۇل كورسەتكىش ءتىپتى ەۋروپامەن سالىستىرىپ قاراعاندا، ايتارلىقتاي جوعارى.
«ەڭ الدىمەن اقپاراتتاندىرۋ جانە ەسكەرتۋ شارالارى دەپ تۇسىنگەن ءجون. بۇگىندە قازاقستاندا العاشقى مەديتسينالىق-سانيتارلىق كومەك كورسەتەتىن ۇيىمداردا پسيحوالەۋمەتتىك كونسۋلتاتسيالىق كومەك كورسەتەتىن ارنايى زاڭدى تۇلعالار، جاستار ۇيىمدارى بار. جالپى سانى 105 ورتالىق بار. ءبىز جاستاردىڭ وسىنداي ورتالىقتارعا بارعانىن، اقىل-كەڭەس العانىن قالايمىز»، - دەپ اتاپ ءوتتى مينيسترلىك وكىلى.
كامەلەتكە تولماعاندار ۇلكەندەردىڭ كەلىسىمىنسىز ابورت جاساتۋىنىڭ قۇقىقتىق جاعىنا كەلسەك، كەرى سالدارلارى ءۇشىن بارلىق جاۋاپكەرشىلىكتى مەديتسينالىق قىزمەتكەر ارقالايدى.
«قۇقىقتىق مەحانيزم زاڭنامادا كورسەتىلگەن. كورسەتىلگەن مەديتسينالىق قىزمەتتىڭ ساپاسى ءۇشىن ارينە، مەديتسينالىق قىزمەتكەر جاۋاپ بەرەدى. ال جاس ءوسپىرىم مەديتسينالىق قىزمەت الۋعا قۇقىلى بولادى»، - دەپ ءتۇسىندىردى ا. يسماعامبەتوۆا.
اتالعان نورما ازىرگە تالقىلانىپ جاتىر، ول «حالىق دەنساۋلىعى جانە دەنساۋلىق ساقتاۋ جۇيەسى تۋرالى» ق ر كودەكسىندە قاراستىرىلعان. نورما قابىلدانعان جاعدايدا، جاس ءوسپىرىم ابورتقا كەلىسىم بەرەتىن قۇجاتقا ءوزى قول قويادى.