سۋديالار ءبىر كۇندە 16 شەشىم شىعارادى - جاقىپ اسانوۆ

استانا. قازاقپارات - جوعارعى سوت ءتوراعاسى جاقىپ اسانوۆ حالىقتىڭ قىلمىستىق-ازاماتتىق ىستەر بويىنشا سوت شەشىمىمەن كەلىسپەي، جوعارى ينستانسيالارعا شاعىمدانۋ سەبەپتەرىن ءتۇسىندىردى، دەپ حابارلايدى قازاقپارات ءتىلشىسى.

«مۇنداعى باستى سەبەپتەردىڭ ءبىرى - سۋديا جۇكتەمەسىنىڭ جىلدان-جىلعا ءوسۋى بولىپ وتىر. بەس جىل بۇرىن سوت جۇيەسى جىلىنا 1 ميلليون 300 مىڭ ءىس قاراسا، 2017 -جىلى بۇل كورسەتكىش ەكى ەسە ۇلعايىپ، 2 ميلليون 700 مىڭعا جەتكەن. سوندا ءبىر مەزەتتە ءاربىر سۋديانىڭ وندىرىسىندە ورتا ەسەپپەن 100 ءىس پەن ماتەريال بار، استانا مەن الماتىدا 300 گە دەيىن جەتەدى. ياعني، سۋديالار كۇنىنە 16 ءىس پەن ماتەريال بويىنشا شەشىم قابىلدايدى»، - دەدى جاقىپ اسانوۆ.

سونداي-اق، جوعارعى سوت ءتوراعاسى سۋديا شەشىمىنە زاڭناماداعى كەمشىلىكتەردىڭ دە ىقپال ەتەتىنىن جاسىرمادى.

«ەكىنشىدەن، ءبىزدىڭ زاڭنامامىزدا كوپ جاعدايدا ناقتىلىق جوق. بىلاي دا شەشۋگە بولادى، بىلاي دا شەشۋگە بولادى. ال زاڭنامانىڭ كەمشىلىگى ەرتەڭ سۋديانىڭ كەمشىلىگى بولادى. ويتكەنى ءاربىر تاراپ سول زاڭدى ءوز پايداسىنا قابىلدايدى. باستى سەبەپتەر بۇل ەمەس، ەڭ باستى سەبەپ - سۋديالاردىڭ ءسوز شەبەرلىگىنىڭ ازدىعى. ءبىز سوت اكتىسىن نەگىزدەپ تۇسىنىكتى تىلمەن جازا بىلمەيمىز، جازعانىمىزدى قاراپايىم تىلمەن تۇسىندىرە المايمىز، سەندىرە المايمىز. سوندىقتان دا ادامدار سۋديانىڭ نە سەبەپتى وسىنداي قورىتىندىعا كەلگەنىن تۇسىنبەيدى. تۇسىنبەگەندىكتەن، سوت زالىنان سۋدياعا عانا ەمەس، بۇكىل مەملەكەتكە وكپەلەپ شىعادى»، - دەدى جوعارعى سوت ءتوراعاسى.