گەرمانيا ازاماتىن ولتىرگەن قازاقستاندىق قىزدار 16 جىلعا سوتتالدى
سوت ماريا ەۆپوۆار مەن يرينا ميحايليۋكتى توپتاسىپ كىسى ولتىرگەندەرى جانە ءىرى كولەمدە ۇرلىق جاساعاندارى ءۇشىن ايىپتى دەپ تانىدى.
«ءار قايسىسىنا 16 جىلعا باس بوستاندىعىنان ايىرۋ جانە جازالارىن قاۋىپسىزدىگى ورتاشا دەڭگەيدەگى قىلمىستىق-تۇزەتۋ مەكەمەسىندە وتەۋ جازاسى تاعايىندالسىن، - دەپ وقىدى شەشىمدى سۋديا قۇداباي سۇلتانوۆ. سونىمەن قاتار، سوت ەكى قىزعا جاپا شەگۋشى جاققا ەكى ميلليون تەڭگەدەن وتەماقى تولەۋگە مىندەتتەدى. سوتتالۋشىلار بۇل قارجىنى 2018-جىلدىڭ 30- ماۋسىمىنا دەيىن وتەۋى ءتيىس. سوت شەشىمى زاڭدى كۇشىنە ەنگەن جوق.
ەسكە سالايىق، 2018-جىلدىڭ قاڭتار ايىندا گەرمانيا ازاماتىن ءولتىرۋ ءىسى جابىق كۇيدە قارالا باستاعان بولاتىن. وقيعا وتكەن جىلدىڭ قازان ايىندا پاۆلودار قالاسىنىڭ ۋسولكا شاعىن اۋدانىنداعى ۇيلەردىڭ بىرىندە بولعان. كۇدىكتى رەتىندە جالدامالى پاتەردە بىرگە تۇراتىن 19 جاستاعى قىزدار ۇستالعان بولاتىن. ايىپتالۋشىلاردىڭ بىرەۋى ءدامحانادا داياشى بولىپ ىستەسە، ەكىنشىسى جەرگىلىكتى مەدكوللەدجدىڭ ستۋدەنتى. تەرگەۋشىلەردىڭ مالىمەتىنشە، جاس قىزدار جىگىتكە 20 رەت پىشاق جاراقاتىن سالعان.
