الەۋمەتتىك جەلىدەگى سوزدەرى ءۇشىن 16 قازاقستاندىق اباقتىعا جابىلدى

استانا. قازاقپارات - جىل باسىنان بەرى 20 قازاقستاندىق الەۋمەتتىك جەلىدەگى سوزدەرى ءۇشىن سوتقا تارتىلدى.

ولاردىڭ 16 سى باس بوستاندىعىنان ايىرىلدى، دەپ حابارلايدى قازاقپارات ق ر باس پروكۋراتۋراسىنا سىلتەمە جاساپ.

قۇقىقتىق ستاتيستيكا جانە ارنايى ەسەپكە الۋ كوميتەتىنىڭ قازاقپاراتقا جىبەرگەن دەرەكتەرىنە سايكەس، 1 قۇقىق بۇزۋشى قازاقستاننىڭ ۋنيتارلىعى مەن تۇتاستىعىن بۇزۋعا شاقىرعانى ءۇشىن 5 جىلعا تۇرمەگە جابىلعان. تاعى 15 ازامات قىلمىستىق كودەكستىڭ 256-بابى بويىنشا سوتتالعان.

ولار تەرروريزمدى ناسيحاتتاپ، تەراكت جاساۋعا شاقىرعاندارى ءۇشىن ايىپتى دەپ تانىلىپ، 2 جىلدان 9 جىلعا دەيىن اباقتىعا قامالعان.

تاعى ەكى زاڭ بۇزۋشىنىڭ ق ر ق ك 174-بابى - الەۋمەتتىك، ۇلتتىق، رۋلىق، ناسىلدىك، تەكتىك-توپتىق نەمەسە دىني الاۋىزدىقتى قوزدىرۋ بويىنشا باس بوستاندىقتارى شەكتەلگەن.

الەۋمەتتىك جەلىدە بيلىك وكىلىن بالاعاتتاعان ءبىر قازاقستاندىق شامامەن 227 مىڭ تەڭگە ايىپپۇل تولەگەن.

اۋدارما: ايجان سەرىكجان قىزى