ءبىر ارنادا توعىسىپ 16 قالادا تۇتانعان الاۋ، ۋنيۆەرسيادانىڭ اشىلۋىن الەمگە پاش ەتتى - بايبەك

الماتى. قازاقپارات - ەلىمىزدىڭ 16 قالاسىندا جاعىلعان الاۋلار ءبىر ارنادا توعىسىپ، 28- بۇكىلالەمدىك قىسقى ۋنيۆەرسيادانىڭ اشىلۋىن بۇكىل الەمگە پاش ەتتى، دەدى الماتى قالاسىنىڭ اكىمى باۋىرجان بايبەك بۇگىن ءال-فارابي اتىنداعى قازاق ۇلتتىق ۋنيۆەرسيتەتىندە وتكەن ۋنيۆەرسيادا الاۋىنىڭ جاعى سالتاناتتى شاراسىندا، دەپ حابارلايدى قازاقپارات ءتىلشىسى.
None
None

الاۋ تۇتاتۋ سالتاناتىندا ءسوز العان قالا اكىمى الماتى بۇل تاريحي وقيعاعا 5 جىل دايىندالعانىن ايتتى. «ۋنيۆەرسيادا الماتىنىڭ دامۋىنا تىڭ سەرپىن بەرىپ، اجارىن اشا ءتۇستى. جاڭادان سپورت عيماراتتارى سالىنىپ، قالامىزدىڭ كوركىنە كورىك قوستى»، - دەدى باۋىرجان بايبەك.

قۇتتىقتاۋ سوزىندە قالا باسشىسى الاۋعا قاتىستى «وت»، «وتان»، «وت انا» سوزدەرىنىڭ ءمان- ماعىناسىنا توقتالدى.

«حالقىمىز ءۇشىن قىمبات «وتان»، «وتباسى» دەگەن ۇعىمداردىڭ ءتۇبىرى وسى وتتان شىققان. «وتان - قۋات، وتباسى - شۋاق» دەيدى دانا حالقىمىز. ۋنيۆەرسيادا قازاق جەرىندە، الماتى قالاسىندا تۇڭعىش رەت ءوتىپ وتىر. ۋنيۆەرسيادا الاۋىن تۇتاتۋ ءراسىمى ەلىمىزدىڭ بارلىق وڭىرلەرىندە ءوتىپ، وعان 100 دەن استام جوو ستۋدەنتتەرى قاتىسادى. استاناداعى نازاربايەۆ ۋنيۆەرسيتەتىندە الاۋدى ەلباسى ءوزى تۇتاتتى. ەلىمىزدىڭ 1000 نان استام ازاماتى ونى الىپ ءجۇرۋ قۇرمەتىنە يە بولدى.

مىنە، ۋنيۆەرسيادا الاۋى الماتى تورىنە دە كەلىپ جەتتى»، - دەدى باۋىرجان بايبەك. ءوز سوزىندە الماتى اكىمى سپورتشىلارىمىزعا ساتتىلىك تىلەدى. «الەمدىك جارىستاردا توپ جارىپ جۇرگەن سپورتشىلارىمىزدىڭ وسى جولى دا باعى جانسىن. بارشامىز قولداۋ كورسەتەيىك»، - دەپ ساتتىلىك تىلەدى.

ايتا كەتەيىك، بۇگىن الماتىدا ءال-فارابي اتىنداعى قازاق ۇلتتىق ۋنيۆەرسيتەتىندە 2017 -جىلعى 28- دۇنيەجۇزىلىك قىسقى ۋنيۆەرسيادا الاۋى ەستافەتاسىنىڭ باستى الاۋى جاعىلدى. ءال-فارابي اتىنداعى قازاق ۇلتتىق ۋنيۆەرسيتەتىنىڭ ۇزدىك ستۋدەنتى ايسۋلۋ ەرنيازوۆا ەستافەتا الاۋىن الماتى اكىمىنە تابىس ەتتى.

الاۋدى باۋىرجان بايبەك وليمپيادا چەمپيونى دميتري بالاندينگە تابىستاپ، ساتتىلىك تىلەدى. ەندى الاۋدى ۆەللەيبولشى سۇلۋ ءسابينا التىنبەكوۆا، داۋلەت تۇرلىحانوۆ، امالبەك تشانوۆ سىندى ەلىمىزگە تانىمال تۇلعالار قالا كوشەلەرىمەن الىپ جۇرەدى. ايتا كەتەيىك، رەسمي تاسىمالداۋشى «ەير استانا» كومپانياسى ەلىمىزدىڭ ايماقتارىنان 15 الاۋدى الماتى قالاسىنا جەتكىزدى.

بۇعان دەيىن ۇيىمداستىرۋشىلار 2017 -جىلعى الماتىداعى 28-دۇنيەجۇزىلىك قىسقى ۋنيۆەرسيادانىڭ الاۋ ەستافەتاسى ەرەكشە وقيعا ەكەنىن ايتتى.

ونىڭ ەرەكشەلىگى - ۋنيۆەرسيادا الاۋى قازاقستاننىڭ تۇكپىر- تۇكپىرىندە، 16 قالادا جاعىلىپ، الماتىدا باستى الاۋعا ۇلاستىرىلۋىندا. الاۋ قازاقستاننىڭ 16 قالاسىنا بارىپ، جەر بەتىمەن 200-دەن استام شاقىرىمدى، اۋەدە (ۇشاقپەن تاسىمالدانۋ) 2300 شاقىرىمدى ءجۇرىپ وتەدى. الاۋدى تۇتاندىرۋدىڭ سالتاناتتى ءراسىمى 25 -قاڭتاردا استانا قالاسىندا، نازاربايەۆ ۋنيۆەرسيتەتىندە ءوتتى. 26, 27 جانە 28 -قاڭتاردا 14 وبلىس ورتالىعىندا الاۋ وتى جاعىلدى. 29 -قاڭتاردا ايماقتاردىڭ وزىق ستۋدەنتتەرى الاۋدى الماتىداعى تۇعىرىنا جەتكىزدى. جوباعا 1000 الاۋگەر قاتىستى.

اۆتور: الماس مۇقاش ۇلى

سوڭعى جاڭالىقتار