قازاقستاندا 16 اۋماقتىق قورعانىس باسقارمالارى قۇرىلادى
بۇل تۋرالى بۇگىن ماجىلىستە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قورعانىس جانە اسكەري قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنىڭ تانىستىرىلىمى بارىسىندا ءمالىم بولدى.
زاڭ جوباسى قورعانىس جانە اسكەري قىزمەت سالاسىنداعى قوعامدىق قاتىناستاردى رەتتەۋگە، زاڭناماداعى قۇقىقتىق نورمالار اراسىنداعى قايشىلىقتاردى، ولقىلىقتاردى، كولليزيالاردى جويۋعا باعىتتالادى.
مەملەكەتتىك قورعانىستىق تاپسىرىس، اۋماقتىق قورعانىس جۇيەلەرىن جەتىلدىرۋ ماسەلەلەرى دە قاراستىرىلادى.
قورعانىس ءمينيسترىنىڭ ورىنباسارى تالعات مۇحتاروۆتىڭ ايتۋىنشا، مەملەكەت باسشىسىنىڭ 2015-جىلدىڭ 25- جەلتوقسانىنداعى جارلىعىنا سايكەس، قازاقستاندا اۋماقتىق اسكەرلەر قۇرىپ، ولاردى قورعانىس جۇيەسىمەن ىقپالداستىرۋ كوزدەلگەن بولاتىن.
«اۋماقتىق قورعانىس قورعانىس كۇشتەرىنىڭ قۇرامىنا ەنەتىن بولادى. ال اۋماقتىق قورعانىس اسكەري ءبولىمنىڭ جەتەكشىلەرى - اسكەري قىزمەتشى مارتەبەسىندە، ال شتاب جۇمىسشىلارى اسكەري مىندەتتىلەر بولىپ تابىلادى. زاڭ جوباسى اياسىندا اسكەري مىندەتتىلەردى ارنايى اسكەري جيىندارعا شاقىرۋ، اسكەري قىزمەتشى مارتەبەسىن بەرۋ ماسەلەسى قاراستىرىلىپ، ولارعا قولدانىستاعى زاڭنامادا كورسەتىلگەن قۇقىقتار مەن مىندەتتەر بەلگىلەنەدى. سونىمەن قاتار، وبلىستىق جانە استانا مەن الماتى قالالارىنىڭ جەرگىلىكتى اتقارۋشى ورگاندارى قۇزىرەتىنە اۋماقتىق قورعانىس بولىمدەرىن قامتاماسىز ەتۋ ماسەلەسى بەرىلەدى. وسىلايشا، كورسەتىلگەن نورمانى جۇزەگە اسىرۋ ءۇشىن ەلىمىزدىڭ 14 وبلىسى مەن استانا، الماتى قالالارىندا 16 اۋماقتىق قورعانىس بريگادالار باسقارمالارى قۇرىلاتىن بولادى»، - دەدى مينيستر ورىنباسارى.
ونىڭ سوزىنە قاراعاندا، اۋماقتىق قورعانىس باسقارمالارىن قۇرۋ بويىنشا الەمنىڭ وزىق تاجىريبەلەرى زەردەلەنگەن.
اۆتور: قانات مامەتقازى ۇلى
