قازاقستان قۇراماسى اراعا 16 جىل سالىپ جولدامانى جەڭىپ الدى

استانا. قازاقپارات - فۋتزالدان قازاقستان ۇلتتىق قۇراماسى كولۋمبيادا وتەتىن الەم چەمپيوناتىنا جولداما جەڭىپ الدى.

وتانداستارىمىز قارىمتا ويىندا پولشا قۇراماسىن 7:0 ەسەبىمەن ويسىراتا جەڭدى.

قازاقستان قۇراماسى ويىندى اسا شيراق باستادى. قارسىلاستارىنا بارىنشا قىسىم جاساي بىلگەن وتانداستارىمىز ناتيجەنى كوپ كۇتتىرمەدى. قاقپاشى يگيتانىڭ شاپشاڭ قيمىلى پولياك ويىنشىلارىن سان سوقتىردى.

شابۋىلىن ۇدەتكەن كاكاۋ شاكىرتتەرى مۇنىمەن توقتاپ قالعان جوق. 5- مينۋتتا قازاقستان قۇراماسى كەزەكتى جۇيەلى شابۋىلىنىڭ ناتيجەسىندە. سەرىك جامانقۇلوۆ ەسەپتى 2:0 گە جەتكىزدى. ويىن جۇيەسىن وزگەرتپەك بولعان پولياكتار قازاقستاندىق ويىنشىلاردىڭ جىلدام شابۋىلدارىنا ىلەسە المادى. ءبىرىنشى تايم اياقتالعانشا دۋگلاس پەن جامانقۇلوۆ دۋبل اۆتورى اتاندى.

ەكىنشى تايمدا پولشا قۇراماسىنىڭ ويىنشىلارى قورعانىسقا باسا نازار اۋدارا باستادى. ويىن ءبىرشاما باسەڭسىپ، قوس قۇراما قورعانىستا ساۋاتتى ويناي باستادى. دەسە دە قازاقستان قۇراماسىنىڭ ويىنشىلارى شابۋىلدا قاۋقارلى ەكەنىن بايقاتا ءبىلدى.

26 مينۋتتا لەو ەسەپتى 6:0 گە جەتكىزسە، اراعا 4 مينۋت سالا ارنولد كناۋب پولياكتار قاقپاسىنا 7-گولدى سوقتى. ناتيجەسىندە قوس ويىن قورىتىندىسى بويىنشا قازاقستان قۇراماسى پولياكتاردى 8:1 ەسەبىمەن جەڭىپ، كولۋمبيادا وتەتىن الەم چەمپيوناتىنا جولداما جەڭىپ الدى.

ايتا كەتەيىك، قازاقستان قۇراماسى الەم چەمپيوناتىنا اراعا 16 جىل سالىپ جولداما الىپ وتىر. دودا 10- قىركۇيەك پەن 2- قازان ارالىعىندا كولۋمبيادا وتەدى.

Massaget.kz