كومەديالىق فيلم «16 قىزدىڭ» سىرى مەن جىرى

استانا. قازاقپارات - ارۋلار مەرەكەسى قارساڭىندا «16 قىز» اتتى فيلم جارىققا شىقتى.

اتاۋى تانىس ەستىلەدى، ءا؟ ءيا، فيلمنىڭ جارىققا شىعۋىنا ايگىلى «دوس-مۇقاساننىڭ» ورىنداۋىنداعى «16 قىز» ءانى سەبەپ بولعان ەكەن.

رومانتيكالىق كومەديا - ق ر مادەنيەت جانە سپورت مينيسترلىگى، «قازاق فيلم» جانە «KANAIDAR Production» بىرلەستىگىنىڭ ءونىمى. فيلمنىڭ رەجيسسەرى - قاناعات مۇستافين. «بۇل تۋىندىمىزدى شاكەن ايمانوۆ اتامىزدىڭ 100 جىلدىق مەرەيتويىنا ارنادىق» دەيدى رەجيسسەر. راسىمەن دە، كينونى تاماشالاپ وتىرىپ، وتكەن عاسىردىڭ 60-70 -جىلدارىنا تاپ بولعانداي سەزىمدە بولاسىڭ. رەترواندەر، كەيىپكەرلەر بەينەسى، ۆولگا كولىگى... ياعني، شاكەن فيلمدەرىنىڭ ءستيلى بايقالادى. دەگەنمەن، وقيعانىڭ ءبارى دە قازىرگى زاماندا ءوربيدى. نۇرجان مەن ساليما ەسىمدى قاريالار ۇلدارىن تەزىرەك ۇيلەندىرۋدى ارماندايدى. ءتىپتى، «بەل قۇدا» سالتىمەن ۇلدارىنا ايتتىرىپ قويعان قالىڭدىق تا بار.

ءبىراق، باۋىرجان ءوزى سۇيگەن ارۋعا ۇيلەنۋدى قالايدى. ونىڭ ۇستىنە، ايتتىرىپ قويعان قالىڭدىعى ايجاننىڭ ءوز سۇيگەن جىگىتى بار ەكەن. «اۋىلعا قالىڭدىقسىز قايتپايمىن» دەگەن باۋىرجانعا ايجان كومەكتەسۋدى ويلايدى. ءسويتىپ، ەكەۋى قالىڭدىق ىزدەپ، تالاي جەردى شارلاپ شىعادى.

وسىلايشا، ءفيلمنىڭ ءتۇسىرىلىمى استانا، الماتى، قاراعاندى، تالدىقورعان قالالارىندا جانە ش. ايمانوۆتىڭ تۋعان جەرى باياناۋىلدا جۇرگىزىلەدى. باياناۋىلداعى شاكەن اتالارىڭنىڭ اتىنداعى مەكتەپ وقۋشىلارى دا فيلمگە اتسالىسىپتى. تاۋەلسىزدىك العالى بەرى «قازاق فيلمدە» تازا قازاق تىلىندە تۇسىرىلگەن كومەديالىق فيلم - وسى «16 قىز». رولدەردى بەرىك ايتجانوۆ، اشا ماتاي، انۋار نۇرپەيىسوۆ، گۇلجامال قازاقبايەۆا، كادىربەك دەمەسىنوۆ، نۇكەتاي مىشپايەۆا، جانيا دجۋرينسكايا سىندى تانىمال ارتىستەر سومدايدى. «كينونى قالاي قىزىق ەتسەك بولادى؟» دەگەن ويمەن ءتورت جىل بويى سەناريدىڭ سەگىز ءتۇرلى نۇسقاسىن ازىرلەدىك. ءبىر ەمەس، بەس ادام بىرلەسىپ جازدىق»، - دەيدى فيلمنىڭ پروديۋسەرى ايدارحان ابىلبايەۆ.

فيلمنىڭ ءتۇسىرىلىم ۋاقىتى باس- اياعى 56 كۇنگە سوزىلعان. باياناۋىلداعى كۇزگى قارا سۋىققا قاراماستان، ەپيزودتار جازداعىداي ەتىپ تۇسىرىلگەن. ال، كاستينگكە 3862 ادام قاتىسقان. كينوداعى قالانىڭ كورىكتى جەرلەرى، شارىن شاتقالىنداعى پەيزاج، كومپيۋتەرلىك گرافيكا، وڭدەلگەن رەترو اندەر، ادەمى قالجىڭ كورەرمەنىن باۋراپ الادى دەگەن سەنىمدەمىز. رەجيسسەر اعالارىڭ مەن اكتريسا اپكە، اپالارىڭدى جاڭا تۋىندىسىمەن قۇتتىقتاپ، «16 قىزبەن» جاقىنىراق تانىستىق.

قاناعات مۇستافين، رەجيسسەر:

«16 قىز» - ارۋلار مەرەكەسىنە تارتۋىمىز

ۇلان: قاناعات، فيلمنىڭ ۋاقىتى جايلى قىزىق دەرەكتى ەستىدىك. كينوتەاترلارعا كەلگەن كورەرمەن 95 مينۋتتىق ءفيلمدى كورسە، تەلەارنا ارقىلى ەكى ساعاتتىق نۇسقاسىن كورەتىنىن ايتتىڭىز. سوندا بۇگىن ءبىز قانداي قىزىقتى سيۋجەتتەردى كورمەي قالدىق؟

ق. مۇستافين: يا، ەكى ءتۇرلى نۇسقا بار. ءبىرى جالپى پروكاتقا ارنالعان، ەكىنشىسى - رەجيسسەرلىك نۇسقا. باسىندا فيلم 3 جارىم ساعاتتىق بولىپ شىقتى. ويلانا كەلە جارتىسىن كەسىپ تاستاۋعا تۋرا كەلدى. سىزدەر ءقازىر تالعاتتىڭ ارالۋان قىزبەن تانىساتىن كورىنىستەرىن، سوسىن اۋىلداعى قوس قاريا - سەكە مەن ماكەنىڭ قاتىسۋىمەن بولعان جايتتاردى تولىق كورمەدىڭىزدەر. قىسقاسى، كينونىڭ جالپى مازمۇنىن وزگەرتپەيتىن تۇستارىن قيدىق.

ۇلان: فيلمدە «دوس- مۇقاسان» ءانسامبلىنىڭ رەپەرتۋارىنداعى اندەر ورىندالادى. نەگىزگى كورەرمەن جاستار عوي. ولار رەترو اندەردى تىڭداۋعا اۋەس بولادى دەپ ويلايسىز با؟

ق. مۇستافين: بۇل اڭىز ءانسامبلدى كينوعا قوسقانىمىز ءجون بولدى دەپ ويلايمىن. ال توپتىڭ رەپەرتۋارىنداعى اندەردىڭ ءبارىن سازگەر نيكيتا كاريەۆتىڭ كومەگىمەن زاماناۋي وڭدەۋدەن وتكىزدىك. جاستارىمىز ەندى «دوس- مۇقاساننىڭ» اندەرىن جاڭاشا وڭدەۋمەن تىڭدايدى. وسىلايشا، بۇرىنعى اۋەندەر قايتا جاڭعىرادى دەگەن سەنىمدەمىز.

ۇلان: «16 قىزدان» بۇرىن «قاجىمۇقان» فيلمىن ءتۇسىرۋدى قولعا العان ەدىڭىز.

ءتىپتى، 2015 -جىلى كورسەتۋدى جوسپارلاعانسىز. نەگە ءتۇسىرىلىم توقتاپ قالدى؟

ق. مۇستافين: «قاجىمۇقان» فيلمى - قوماقتى قاراجاتتى قاجەت ەتەتىن جوبا.

بۇيىرسا، ول فيلمدى دە جارىققا شىعارامىز. ونداي سالماقتى تۋىندىنى اسىعىس شىعارا سالۋعا بولمايدى.

ۇلان: «16 قىزدا» قازاقتىڭ سالت- داستۇرلەرى دە كورسەتىلىپ، ايتىلدى. ەندى كەلەر جولى حالقىمىزدىڭ قاي سالت- ءداستۇرىن كورسەتسەم دەگەن ويىڭىز بار؟

ق. مۇستافين: ار كينونىڭ وزىندىك يدەولوگياسى بولۋ كەرەك قوي. بۇل - وتباسىلىق كينو. جاس وسكىنگە وزىندىك ايتار ويى، بەرەر تاربيەسى بولعانى ءجون. ءوزىڭىز كورگەندەي، وسى «16 قىز» فيلمىندە «بەل قۇدا» سالتىن قايتا جاڭعىرتۋ جايىن قوزعادىق. قاراشاڭىراقتا ءۇش ۇرپاقتىڭ بىرگە تۇرۋى دا ايتىلدى. الداعى ۋاقىتتا دا قازاقتىڭ ۇمىتىلىپ بارا جاتقان سالت- داستۇرلەرىن تۋىندىلارىمىزدا تىلگە تيەك ەتە بىلسەك، جامان بولماس ەدى. كورە جاتارمىز.

ۇلان: الماتى دا، تالدىقورعان دا، باياناۋىلداعى اۋىل دا كينوڭىزدا وتە ادەمى، تازا بوپ كورسەتىلدى. ءتىپتى، سارقاندقا بارا جاتقان ساتتەگى جولعا دەيىن سىپىرىپ، تازالاپ قويعان سياقتىسىزدار...

ق. مۇستافين: ءيا، جولداردى تازارتتىق. وسى كۇنگە دەيىن نە تۇسىرسەك تە، ەلىمىزدىڭ ءار قالاسىن، اۋىلدارىن بارىنشا ادەمى، تازا ەتىپ كورسەتۋدى ماقسات ەتەمىز. سوسىن قازىر اۋىلداعىلار قالالىقتاردان گورى باي تۇرادى. ول باسقا ماسەلە. ەڭ الدىمەن ادامنىڭ جان- دۇنيەسىنىڭ تازالىعى مەن بايلىعىن كورسەتكىم كەلەدى. ال كەيىپكەرلەردىڭ ماتەريالدىق بايلىعى كورەر كوزگە ادەمى كورىنۋى ءۇشىن جاسالادى.

ۇلان: قۇمالاقشى وبرازىن كۇلدىرۋ ءۇشىن قوستىڭىز با، الدە ءالى كۇنگە بال اشتىرعىش ادامداردى اجۋالاۋ ءۇشىن بە؟

ق. مۇستافين: كينونىڭ سوڭىندا تيتردان شىعاتىن جازۋ ەسىڭىزدە مە؟ «كۇلاش ەندى تەلەديداردان بال اشىپ ءجۇر» دەگەن جازۋ شىعادى. ونىڭ اقشا تابۋدى كوزدەگەن جالعان ارەكەتىن سولاي كورسەتپەك بولدىق.

ۇلان: «16 قىز» حالىقارالىق كينوبايقاۋلارعا قاتىسا ما؟

ق. مۇستافين: نەگىزى، ونداي وي بولماعان. ال ەگەر كينوفەستيۆالدەرگە قاتىسار مۇمكىندىك بولسا، قۋانامىز. بۇل «16 قىز» ءفيلمىن ەلىمىزدەگى ارۋلارعا تارتقان سىيىمىز دەپ قابىلداڭىزدار.

ۇلان: راحمەت! كينوڭىز كورەرمەننىڭ كوزايىمىنا اينالسىن.

 


گۇلجامال قازاقبايەۆا، «16 قىز» فيلمىندەگى ساليما اپا:

«بەل قۇدا» سالتىن جاڭعىرتۋدىڭ ايىبى جوق

ۇلان: گۇلجامال اپا، كوڭىل كۇيىڭىزگە قاراسام، كينو كوڭىلىڭىزدەن شىققان سياقتى؟

گ. قازاقبايەۆا: يا، بالام، ۇنادى. شاكەن ايمانوۆتىڭ ستيلىندەگى ءبىر دۇنيە كورگەندەي بولدىم. ء«بىزدىڭ سۇيىكتى دارىگەر» فيلمى ەسىڭدە مە؟

ۇلان: ءيا...

گ. قازاقبايەۆا: مىنە، سول فيلمدەر تۇسىرىلگەن ۋاقىتقا قايتا تاپ بولعانداي بولدىم.

ۇلان: باستى كەيىپكەر باۋىرجاننىڭ اناسىن سومدادىڭىز. ومىردەگى قالپىڭىز بەن كينوداعى بەينەڭىز ۇقساي ما؟

گ. قازاقبايەۆا: انا اتاۋلىنىڭ ءبارى بالاسىنا جاقسىلىق تىلەيدى عوي. ءبىراق، كينوداعىداي كۇيىپ- ءپىسىپ، بالالارىمنىڭ مازاسىن الا بەرمەيمىن (كۇلىپ).

ۇلان: كينوداعىداي وتىرىك اۋىرىپ قالمايمىن دەيسىز عوي؟

گ. قازاقبايەۆا: ءيا، ءيا... ماعان رەجيسسەر بالا قاتتى ۇنايدى. ونىمەن جۇمىس جاساۋ ءبىر عانيبەت ەكەن.

ۇلان: ەندەشە، ول بالاڭىز تاعى كينوعا تۇسىرەيىن دەسە، دايىنسىز عوي؟

گ. قازاقبايەۆا: قاناعات شاقىرسا ما؟ جۇگىرىپ باراتىن ەدىم (كۇلىپ). ول بالادان بۇدان دا جاقسى تۋىندىلاردى كۇتەمىز.

ۇلان: «بەل قۇدا» سالتىنىڭ قازىرگى زاماندا ساقتالعانى ءجون دەيسىز بە، الدە؟

گ. قازاقبايەۆا: قاي اتا- انا بالاسى جامان بولسىن دەيدى، بالام- اۋ. بۇل سالتتىڭ دا ءمانىسى سوندا عوي. «تەڭ- تەڭىمەن...» دەگەن بار. ءبىر- ءبىرىن جاقسى بىلەتىن سىيلاس جاندار ءوزارا قۇدا بولۋدى قالاسا، نەسى ايىپ؟ ! ول سالتپەن قوسىلعان جاستار باقىتتى بولار ەدى دەپ ويلايمىن. ەكى جاقتاعى ۇل مەن قىز دا قالاپ تۇرسا، ارينە. ايتپەسە، زورلىق جوق.

ۇلان: ءوز بالالارىڭىزدى تۇگەل اياقتاندىردىڭىز با؟

گ. قازاقبايەۆا: يا، ۇلىم ۇيادا، قىزىم قيادا دەگەندەي.

ۇلان: نەمەرەلەرىڭىز مەرەكەگە وراي سىزگە سىي دايىنداپ جاتقان شىعار؟

گ. قازاقبايەۆا: يا- ا، ۇنەمى ءوز قولدارىمەن ءبىر دۇنيەلەر جاساپ بەرەدى. بيىل دا سونداي ءبىر قىزىقتى كۇتىپ ءجۇرمىن.

گۇلباۋشان تىلەۋبەكوۆا، «16 قىز» فيلمىندە بالگەر كۇلاشتى سومداۋشى:

مەنى «شۋبام» قۇتقاردى...

ۇلان: گۇلباۋشان اپاي، سىزگە «16 قىز» ۇنادى ما؟

گ. تىلەۋبەكوۆا: دايىن دۇنيەگە سىنشى كوپ قوي. دەگەنمەن، ار كورەرمەن ءوز باعاسىن بەرەر. ال مەنىڭ كوڭىلىمنەن شىقتى. بۇل جەردە ءوز ءرولىمدى ايتىپ تۇرعام جوق. ءوز قاتەمىزدى ىشتەي ءبىلىپ وتىرامىز عوي. ءاردايىم كوكەيدە «بۇدان دا جاقسى ويناۋعا بولار ەدى» دەگەن وي تۇرادى. مەن اكتريسا رەتىندە قاناعاتپەن ءبىرىنشى رەت جۇمىس جاسادىم. بەرىك ايتجانوۆپەن دە العاش رەت بىرگە كينوعا ءتۇستىم. ەڭبەكقور جاستارعا قالاي ريزا بولمايسىڭ؟ ! كەشە ءبارىڭ دايىن دۇنيەنى ءبىر جارىم ساعاتتا كورىپ شىقتىڭدار. ال ول كينونى ءتۇسىرۋ بارىسىنداعى ماشاقاتتى ەشكىم بىلمەيدى. مىسالى، باياناۋىلداعى ءتۇسىرىلىم كەزىندە كۇن سالقىن بولدى. جاستار جاعى ۇلبىرەگەن كويلەكپەن ءتۇستى عوي. سوندا دا كامەراعا دىردەكتەگەن قالىپتارىن مۇلدە بايقاتپادى. قانشا جاۋراسا دا، ارتىستەردىڭ دە، ءتۇسىرۋشى جاستاردىڭ دا بىردە- ءبىرىنىڭ قاباق شىتقانىن بايقامادىم. ءبىر- ءبىرىمىزدىڭ اۋىرىپ قالماۋىمىزدى تىلەۋمەن بولدىق. ءۇزىلىس اراسىندا ءبىر- ءبىر كورپە جامىلىپ وتىردىق. ال كينودا كۇن جازداعىداي كورىنىپ تۇر. ال مەنى الگى «شۋبام» قۇتقاردى ەمەس پە (كۇلىپ الدى)؟! اياقتا ەتىك، باستا ورامالىم بولدى دەگەندەي...

ۇلان: كۇلاشتىڭ رولىنە ءسىزدى ارنايى شاقىردى ما؟

گ. تىلەۋبەكوۆا: جوق، باسىندا مەن باسقا رولگە بەكىتىلگەن ەدىم. ەڭ سوڭعى ءسىز قۇمالاقشىنى ويناساڭىز قايتەدى؟» دەدى. «ويباي- اۋ، ءبىر- اق كۇندە قۇمالاقشىنىڭ رولىنە قالاي دايىندالىپ ۇلگەرەم؟» دەدىم. «ۋايىمداماڭىز، باياناۋىلعا جەتكەنشە ۇلگەرەسىز» دەدى. ءسويتىپ، اياقاستى قۇمالاقشى بولىپ كەتكەن جايىم بار (كۇلىپ).

ۇلان: ال ومىردە قۇمالاقشىنىڭ كومەگىنە جۇگىنەتىن كەزدەرىڭىز بولا ما؟

گ. تىلەۋبەكوۆا: قۇمالاقشى ەمەس، قۇدايعا سەنەمىز عوي، اينالايىن. دەگەنمەن، ءوزىمنىڭ الدىن الا سەزىپ- ءبىلىپ وتىراتىن ءبىر قاسيەتىم بار. ونى جاقىندارىم بىلەدى.

ۇلان: قىز- كەلىنشەكتەردىڭ كوپشىلىگى كينوداعى كۇلاش سياقتى قىمبات تون الۋدى ارمانداپ جۇرەدى عوي. ال ءسىزدىڭ وسى تۇرعىدان كەيىپكەرىڭىزگە ۇقساستىعىڭىز بار ما؟

گ. تىلەۋبەكوۆا: العىم كەلگەن دۇنيەنى الامىن. وزىمنەن دە، بالالارىمنان دا شامام جەتسە، ەشتەڭەنى ايامايمىن.

ۇلان: اپاي، ءسىزدى حالىق «تاماشا» ارقىلى تانيدى. ساتيرالىق وبرازداردى ءجيى سومدايسىز. مىنا ءرولىڭىز دە سول سارىندا. مۇلدە باسقا وبرازدى سومداعىڭىز كەلمەي مە؟

گ. تىلەۋبەكوۆا: راس، كومەديالىق رولدەرگە كوبىرەك تۇسەمىن. كەي كەزدە تراگەديالىق ءرولدى العىم كەلەدى. جان دۇنيەم كەيدە درامانى قالايدى. رەجيسسەرلەر قاي ءرولدى ۇسىنسا دا، الىپ شىعۋعا تىرىسامىز عوي.

ۇلان: اپاي، ەرتەڭ مەرەكە عوي. بۇل كۇننەن نە كۇتەسىز؟

گ. تىلەۋبەكوۆا: 8 -ناۋرىز - تۋعان كۇنىم. كوكتەمنىڭ شۋاقتى كۇنىندە دۇنيەگە اكەلگەن اكە- شەشەمە ريزامىن. انام ءالى ورتامىزدا. ول كىسى دە «امان- ەسەن جۇرسەڭدەر بولعانى» دەپ، كورگەن كۇنىنە شۇكىرشىلىك ايتىپ وتىرادى. اناسىنان قولدا باردى ەشكىم دە ايامايدى عوي. شاما جەتكەنشە سىي- سياپاتىمىزدى كورسەتەمىز، ارينە. بالالارىم دا مەنى قۋانتۋعا تىرىسادى.

جانارگۇل جانىامانوۆا، «16 قىز» فيلمىندەگى ماقپال:

جاپونياعا بارعىم كەلىپ كەتتى...

ۇلان: ماقپال رولىنە قالاي بەكىتىلدىڭىز؟

جانارگۇل: كاستينگ ارقىلى بەكىتىلدىم. ءبىر بەينەسىناقتان كەيىن-اق، رەجيسسەر وسى رولگە مەنى بىردەن بەكىتتى.

ۇلان: بۇعان دەيىن نەشە فيلمگە ءتۇستىڭىز؟

جانارگۇل: «انا جۇرەگى» دەگەن فيلمگە، بىرنەشە تەلەحيكاياعا ءتۇستىم.

ۇلان: وسى كينودان سوڭ جاپون تىلىنە قىزىعۋشىلىعىڭىز ويانعان جوق پا؟

جانارگۇل: جاپون تىلىنەن بۇرىن، جاپونياعا بارسام دەگەن قىزىعۋشىلىق وياندى.

ۇلان: انالارىمىزدىڭ مەرەكەسى عوي. ال ءسىز اناڭىزعا ەڭ العاش نە سىيلاعانىڭىز ەسىڭىزدە مە؟ ءوزىڭىز بۇل مەرەكەدەن نە سىي كۇتەسىز؟

جانارگۇل: اناما 2-سىنىپتا ءوز قولىممەن اشىقحات جاساپ، سىيلاعانىم ەسىمدە. ەندى ءوزىمنىڭ دە بالالارىم ءوسىپ، ماعان ءوز قولدارىنان ءبىر سىي جاساپ بەرسە دەپ ارمانداپ ءجۇرمىن. قازىر ۇلكەنى 2 جاستا، كىشىسى 6 ايلىق.

ۇلان: تىلەگىڭىزگە جەتىڭىز!

جانيا دجۋرينسكايا، «16 قىز» فيلمىندەگى ايگەرىم:

وتكەن عاسىرعا تاپ بولعىم كەلەدى

ۇلان: جانيا، قازىر عانا ءوزىڭىز قاتىسقان «16 قىز» ءفيلمىن تاماشالادىق. كوڭىل- كۇيىڭىزگە اسەرى قالاي بولدى؟

ج. دجۋرينسكايا: وي، ماعان كينو ۇنادى. سونداي ادەمى رومانتيكالىق كومەديا شىققان ەكەن. كينودان جاعىمدى اسەرمەن شىقتىم.

ۇلان: ال ءسىز ويناعان ايكا اسا جاعىمدى كەيىپكەر ەمەس...

ج. دجۋرينسكايا: يا، كينوداعى ايكا مەن ومىردەگى جانيانىڭ ايىرماشىلىعى وتە كوپ. نەگىزى، سەناري بويىنشا ايگەرىم ءتىپتى جاعىمسىزداۋ سيپاتتا بولۋ كەرەك ەدى. ال مەن كەيىپكەرىمدى وزىمە قاراي ىڭعايلاۋعا تىرىستىم. ونىڭ دا جۇرەگى بار دەگىم كەلدى.

ۇلان: كوپتەگەن فيلمدەرگە ءتۇستىڭىز، كوپتەگەن رولدەردى سومدادىڭىز. ال ىشتەي قانداي ءرولدى ارماندايسىز؟

ج. دجۋرينسكايا: ءبىر تاريحي فيلمگە تۇسكىم كەلەدى. مەيلى، وتكەن عاسىردىڭ 40-جىلدارى بولسىن، مەيلى 16-17 -عاسىر بولسىن... ايتەۋىر وتكەن زامانعا تاپ بولعىم كەلەدى.

ۇلان: «16 قىزدا» كەيىپكەرىڭىز ايكاعا قىمبات تون سىيعا تارتىلادى. ومىردەگى جانيا دا الداعى مەرەكەدەن سونداي قىمبات سىي كۇتە مە؟

ج. دجۋرينسكايا: ماعان سىيلىق اتاۋلىنىڭ باعاسى ماڭىزدى ەمەس. باستىسى - وزىڭە بولىنگەن نازار. قۇدايعا شۇكىر، مەندە ومىرىمە قاجەتتى دۇنيەنىڭ ءبارى دە بار. ەڭ ۇلكەن سىيىم - اتا- انا، باۋىرلارىمنىڭ اماندىعى. ال ەگەر كىمدە-كىم ءوزى ولەڭ نەمەسە ان شىعارسا، سۋرەت سالسا، ءوز قولىمەن ءبىر زات جاساپ بەرسە... قانداي كەرەمەت! ول ادام سەن ءۇشىن ارنايى ۋاقىتىن، كوڭىلىن بولگەنىن ءتۇسىنىپ، قۋانىپ قالاسىڭ.

ۇلان: اناڭىزعا بالا كۇنىڭىزدە ەڭ العاش نە سىيلاعانىڭىز ەسىڭىزدە مە؟

ج. دجۋرينسكايا: 12-13 جاسار كەزىمدە مەكتەپ ساحناسىندا اناما ارناپ، ان سالعانمىن. سول كەزدە انام قاتتى قۋانىپ قالعانى ەسىمدە. مەنىڭشە، اناڭا سىي جاساپ، كوڭىل ءبولۋ ءۇشىن 8 ناۋرىزدى كۇتۋ ەگويستىك بولار ەدى. قولدان كەلسە، ءجيى-ءجيى قۋانتقان جاقسى ەمەس پە؟! ونىڭ ۇستىنە، انام بايقوڭىردا تۇرادى. مەن الماتىدامىن. سول سەبەپتى، ءدال 8 -ناۋرىز كۇنى اناما سىيىمدى ۇسىنۋ دا وڭاي شارۋا ەمەس. بۇيىرسا، جاقىندا ۇيىمە بارىپ قايتسام دەيمىن. سول كەزدە سىي-سياپاتىمدى الىپ بارامىن عوي.

سۇحباتتاردى جۇرگىزگەن

قارلىعاش دوسانوۆا

«ۇلان»، №10